»Zhromadźene spisy Handrija Zejlerja« digitalnje spřistupnjene na hornjoserbskim rěčnym portalu

Historiske štyrizwjazkowe a nimale 1.500 ćišćanych stron wopřijimace wudaće Zejlerjowych tekstow (1883–1891) je wotnětka w interneće na rěčnym portalu Serbskeho instituta pod hornjoserbsce.de/zejler/ přistupne.

Sobotu (29. oktobra) je rěčespytnik dr. Fabian Kaulfürst w ramiku moderacije Serbskeho spěwarskeho swjedźenja w Budyskej Krónje wozjewił, zo je digitalna edicija “Zhromadźenych spisow Handrija Zejlerja” wotnětka přistupna. Njejedna so wo nowu filologisku ediciju, ale wo wudaće do dalokeje měry bjezzmylkowych wotpisow (transkriptow) originalnych ćišćow.

Nimo originalneje wersije teksta je tež wersija w modernizowanym pisanju přistupna. Dataje móže sej wužiwar tež we formatach PDF, ePUB abo TXT dele sćahnyć, na přikład na e-čitak (e-book).

Zaměr projekta z cyłkownym titulom „Prototyp na korpusowych tekstach bazowaceje hornjoserbskeje digitalneje biblioteki: Zhromadźene spisy Handrija Zejlerja (historiske wudaće 1883–1891)“ je wozjewjenje hornjoserbskeho prototypa po přikładźe delnjoserbskeje digitalneje biblioteki, kotraž je so spočatk lěta zjawnosći předstajiła. Za hornjoserbski wotpowědnik staj so know-how a techniske rozrisanja delnjoserbskeje wersije přewzałoj a přiměriłoj. Motiwowane přez jubilejne lěto Zejlerja a Kocora 2022 su so za prototyp Zejlerjowe zhromadźene spisy wužiwali.

Digitalne wudaće je dalši přinošk Serbskeho instituta k jubilejej, nimo zhromadneho sympozija, dnja 14. oktobra z Maćicu Serbskej w Serbskim muzeju.