Zajimawa namakanka we zběrce Serbskeje filmoweje skupiny

Měrćin Brycka, archiwar při Serbskim instituće, wo zajimawostce w Serbskim kulturnym archiwje:

Tuchwilu zapisujemy w Serbskim kulturnym archiwje fotografiski fundus Serbskeje filmoweje skupiny. Při tym nadeńdźechmy w kartaji mjez druhim wobrazowe předłohi ze zawostajenstwa słowjenskeho molerja Ante Trstenjaka (znaty přez jeho triptychon „Hołdowanje serbskim wótčincam“ ze žurle Serbskeho muzeja w Budyšinje). Nimo čorno-běłych fotografijow w małym formaće (někak 4 cm x 6 cm), kotrež słužachu wuměłcej jako pomjatna pomoc abo předłoha, jedna so wo reprodukcije swojich twórbow. Zwjetša su to wobrazy serbskich narodnych drastow z Hornjeje a Delnjeje Łužicy abo krajina Błótow.

Wosebitosć su noticki a připisy wuměłca, w kotrychž su městno, datum a mjeno zwobraznjenych wosobow (zdźěla samo holče mjeno) zapisane. Dale wobsahuje zběrka powjetšene reprodukcije wonych wobrazow, kotrež zhotowi wuměłski fotograf Jürgen Maćij.

Prawdźepodobnje su tute materialije we wobłuku rešeršow za film “Triptychon – Ante Trstenjak” z lěta 1987 puć do wobstatka filmoweje skupiny namakali.

Předležaca zběrka bu z prowenienčneho wobstatka (t.r. ze zawostajenstwa filmoweje skupiny) wubrana a z wotpowědnymi pokiwami do zběrki historiskich fotografijow přenjesena. Zajimcy móža sej ju na městnje w čitarni Serbskeho kulturneho archiwa w Budyšinje wobhladać.

Pokiwy:

• We wirtuelnej čitarni Serbskeje centralneje bibioteki a Serbskeho kulturneho archiwa namakaće dalše zajimawostki!
• fototeka Sakskeje krajneje a uniwersitneje biblioteki Drježdźany (SLUB), kolekcija „Serbska kultura“, znimale 25000 historiskimi fotami
• publikacija Sorbische Filmlandschaften. Serbske filmowe krajiny (2024)