Wulki zajim za Dźeń archiwow w Serbskim kulturnym archiwje

Něhdźe 50 zajimcow přichwata njedźelu, 3. měrca, na Dźeń archiwow 2024 do Serbskeho kulturneho archiwa. Lětuši moto cyłoněmskeho akciskeho dnja, na kotrymž so w Budyšinje tež měšćanski a statny filialny archiw wobdźělištaj, steješe pod motom “Jěsć a pić”.

W dwěmaj wjedźenjomaj přez magacin Serbskeho kulturneho archiwa informowaše wjednica dr. Annett Brězanec wo stawiznach, nadawkach a wobstatkach archiwa. We swojich zawodnych słowach pak skedźbni na to, zo je lětuši moto łoskoćiwa naležnosć za archiwarow, “přetož w archiwje a bibliotece jěsć a piće ničo pytać nimaja – su ale hustodosć tema historiskich pismow, fotow a filmow”. Historiske fota a filmy wo přihotach kwasneje jědźe, swinjorězanju na serbskich wjeskach a kermuši prezentowaše Měrćin Brycka w sydarni Serbskeho instituta. W bibliotece rozkładźe nawoda biblioteki a archiwa Wito Bejmak, kak so stanu historiske, w frakturnym pismje ćišćane knihi z pomocu OCR (Optical Character Recognition, t.r. technologija za awtomatiske spóznawanje teksta) a KI (kumštnej inteligenscu) tež za lajka přistupne a čitajomne. Rozłoži to na přikładźe knihi “Sserbski wustojny pcžołar” Khrystiana Kulmana (1805-1869) z lěta 1856.

Ale při lětušim moće njesmědźeše kulinariska komponenta falować. Za swojich wopytowarjow su plincy po błótowskim tradicionelnym recepće napjekli – přez 40 plincow su małym a wulkim zajimcam zesłodźeli.

Prawidłownje wobdźěli so Serbski kulturny archiw ze Serbskej centralnej biblioteku na cyłoněmskim akciskim dnju, kotryž so dwulětnje wuhotuje. Zwjazk němskich archiwarow je jón w lěće 2001 zrodźił.