Wotrow a Kopšin – róla hrodźišćow při słowjanskim wobsydlenju Hornjeje Łužicy

Kopschiner-Schanze_Grabung 2011 im Vorburgbereich — Die Grabung 2011 im Vorburgbereich der Kopschiner Schanze wurde aktiv von zahlreichen Ehrenamtlichen unterstützt, im Bild: Sebastian Stenzel, Dr. Erhard Henke und Günter Thus (v.l.) © Museum der Westlausitz

termin: 01.03.2023 18:00 hodź.

Městno zarjadowanja: Muzej Budyšin – přednoškowa žurla – Žitne wiki 1 02625 Bautzen

Friederike Koch-Heinrichs, archeologowka, wjednica Kamjenskeho muzeja Zapadna Łužica:

Wot lěta 800 připućowachu ze Słowjanami nowi sydlerjo z wuchoda a zahajichu srjedźowěk tež za Hornju Łužicu. Archeologiske namakanki z rowow a sydlišćow skića dohlad do tehdyšeho žiwjenja a pokazuja, zo wobsydlichu prjedownicy dźensnišich Serbow wosebje płódne kónčiny Łužicy. W dobje mjez 9. a 12. lětstotkom bě Hornja Łužica w konfliktnym pasmje mjez wuchodnej a srjedźnej Europu. Na zapadźe steješe Słowjanam wuchodnofrankske mócnarstwo napřećo. Runočasnje spytachu Češa, Madźarojo a Morawjenjo na juhu a wuchodźe swój wliw rozpřestrěć. Běše snano tuta wojerska doba přičina za to, zo Milčenjo a Bjezunčenjo w Hornjej Łužicy swoje žiwjenje na hrodźišća a wobtwjerdźene sydlišća koncentrowachu? Hdy přiwzachu hornjołužiscy Słowjenjo křesćansku wěru a kotre wuskutki měješe to na jich wuwiće? Nowe archeologiske a přirodowědne přepytowanja hornjołužiskich hrodźišćow dawaja w zwisku ze znowa wuhódnoćenymi starymi namakankami zajimawe dohlady do žiwjenja Słowjanow a do stawiznow zažneho a wysokeho srjedźowěka našeho regiona.