Studenća z Regensburga na ekskursiju w Budyšinje

Wot 22. do 25.1. 2023 přebywachu studenća Regenburgskeje uniwersity hromadźe z swojimaj profesoromaj we Łužicy, zo bychu so na městnje wo aktualnym połoženju Serbow informowali. Studentki a studenća slawistiki, wučerstwa a wuchodoeuropskich wědomosćow zajimowachu so mjez druhim za aktualne rěčespytne projekty, prašenja dwurěčneho kubłanja a rěčneje politiki kaž tež za serbske medije.

Prof. Björn Hansen, slawist a rěčespytnik, kaž tež prof. Rupert Hochholzer, germanist a fachowc na polu wjacerěčnosće, běštaj zhromadnje ze Serbskim institutom w Budyšinje štyridnjowsku ekskursiju do Łužicy planowałoj. Docentaj staj studentam hižo na uniwersiće w čitanjach a seminarach zymskeho semestra Serbow a serbske temy předstajiłoj a jim konkretne slědźerske nadawki za ekskursiju do Łužicy dałoj.

Póndźelu, dnja 23.2.2023 wopytachu Serbski institut, hdźež jich direktor, prof. Hauke Bartels, powita a jim nadawki a struktura slědźenišća předstaji. Po tym sćěhowachu zajimowani třom tematiskim přednoškam, kotrež běchu prof. Thomas Menzel, dr. Leńka Šołćic a dr. Jana Šołćina spřihotowali.

Popołdnju wobdźěli so skupina studowacych na zjawnej prezentaciji dweju projektow SI w Serbskim domje a wopyta po tym zarjad Domowiny w Serbskim domje.

Wutoru, dnja 24.2., podachu so hosćo do Ralbic. Tam smědźachu na Serbskej wyšej šuli hospitować a wučbu serbšćiny kaž tež dwurěčnu fachowu wučbu w praksy dožiwić. Po krótkim wopyće Serbskeje pěstowarnje podachu so do Dubrjenka. Popołdnju přizamkny so wopyt Serbskeho muzeja w Budyšinje.

Dźeń pozdźišo wopytachu mdr-studijo Budyšin, hdźež mnoho wo wšědnym dźěle serbskich rozhłosownikow zhonichu. Po nakupje serbskich knihow w Smolerjec kniharni powitaštaj jich jednaćel Ludoweho nakładnistwa Domowina a šefredaktor Serbskich Nowinow, zo byštaj jim dźěławosć nakładnistwa, mnohostronske publikacije kaž tež aktualne wužadanja předstajiłoj.