Slědźerska kultura – zawěsćenje dobreje wědomostneje praksy
Serbski institut (SI) ze swojimi wědomostnicami a wědomostnikami je so zawjazał, prawidła dobreje wědomostneje praksy dodźeržeć. Z tym chce wědomostnu integernosć kaž tež kedźbliwy a fairny wobchad mjez sobu zawěsćić a wopačnemu wědomostnemu zadźerženju zadźěwać.
Serbski institut je so směrnicam DFG k zawěsćenju dobreje wědomostneje praksy přizamknył. Trěbne naprawy zwoprawdźi přez kooperaciju z Techniskej uniwersitu w Drježdźananach (TUD) a po přikładźe tamnišich „wustawkow wo zawěsćenju dobreje wědomostneje praksy, wo zadźěwanju wopačnemu wědomostnemu zadźerženja a wo zadźerženju při přeńdźenjach“ (hlej deleka). Za to stej SI a TUD wotpowědne kooperaciske zrěčenje wotzamknyłoj.
Z tym płaća prawidła runje mjenowanych wustawkow TUD tež za wědomostny a wědomostno-techniski personal při SI. Wo prašenjach wědomostneje integernosće kaž tež jako narěčenska wosoba za wšě pady mylneho zadźerženja poradźujetej ombudna wosoba resp. dowěrna wosoba za wědomostny dorost. Tutej wosobje dyrbitej po dowěrliwym poradźowanju, je-li trjeba, dalše kroki zahajić.
Ombudna wosoba w Serbskim instituće
Ombudna wosoba je narěčenski partner, móže poradźować a posrědkować we wšěch podhladnych padach wopačneho wědomostneho zadźerženja . Z móžnej wozjewjenku wobchadźa so dowěrliwje. Tole škita wosobu, kotraž pad přizjewja, a zdobom wosobu, přećiwo kotrejž so podhlad měri. Wopodstatni so z wida ombudneje wosoby podhlad wopačneho wědomostneho zadźerženja, sposrědkuje so tutón přisłušnej přepytowanskej komisiji při Drježdźanskej TU.
dr. Jana Piňosová
jana.pinosova[a]serbski-institut.de, tel. +49 3591 4972-0
zastupnik:
dr. Fabian Jacobs
fabian.jacobs[a]serbski-institut.de, tel. +49 355 48576-482
Wosoba dowěry za wědomostny dorost
Wosoba dowěry za wědomostny dorost je w prěnim rjedźe narěčenska wosoba za promowowacych a móže w situacijach, kotrež začuwaja so hladajo na dobru wědomostnu praksu jako problematiske, poradźować a posrědkować. Je-li trjeba, a hdyž je radu pytaca wosoba přihłosowała, sposrědkuje dowěrna wosoba konfliktny pad ombudnej wosobje. Při tym płaći prawo, so bjezposrědnje na ombudnu wosobu wobroćić, dale.
dr. Jenny Hagemanowa
jenny.hagemann[a]serbski-institut.de, tel. 0355 48 64 48 15
Jako alternatiwa k ombudnej wosobje Serbskeho instituta móže so kóždy sam na nadregionalny gremij „Ombudsman für die Wissenschaft“ wobroćić. Tutón gremij je DFG zasadźiło.
Dalše informacije
- kodeks DFG „Směrnicy za zawěsćenje dobreje wědomostneje praksy“
- směrnicy za dobru wědomostnu praksu při Drježdźanskej TU