9. nowembra (přednošk, podijowa rozmołwa a prezentaciju filmowych wurězkow w Kamjentnym domje w Budyšinje): Serbske filmowe krajiny
termin: 09.11.2023 19:00 hodź.
Městno zarjadowanja: Kamjentny dom, Kamjentna dróha 37, 02625 Budyšin
Předstajenje zhromadneho projekta załožby DEFA ze Serbskim institutom. Kniha z horjeka mjenowanym titulom so přihotuje a wuńdźe w nalěću 2024 (w nakładnistwje BERTZ + FISCHER). Wudawaćelej staj Grit Lemke a Andy Räder.
Referenća:
- dr. Grit Lemke (awtorka a režiserka)
- dr. Andy Räder (uniwerstita w Rostocku)
- Denise Schallenkammerowa (Serbski institut)
Moderacija: dr. Theresa Jacobsowa (Serbski institut)
Zhromadne zarjadowanje Serbskeho instituta a załožby DEFA.
Ke knize
Hižo wot prěnich produkcijow filmow sem steja Serbja a Serbowki před a za kameru. Nachwilny wjeršk dožiwi serbski film w NDR, wosebje w produkciskej skupinje DEFA “Serbska filmowa skupina”. W nowšim němskim filmowym stawiznopisu wostanje serbske filmowstwo nimale njewidźomne. W kooperaciji ze Serbskim institutom pjelni monografija tutu dźěru z přinoškami serbskich a němskich awtorkow a awtorow. Wona skići přehlad wo serbskim filmowstwje wot doby němskeho kejžorstwa hač do přitomnosće. Ćežišćo tworja produkcije DEFA za kino a telewiziju, kaž tež twórby Filmoweje wysokeje šule w Babelsbergu, nastate mjez 1946 a 1992. Přidatnje so najwažniši serbscy filmowcy NDR předstajeja a jich wuznam za serbski a němski film so rozjima. Jednotliwe přinoški wuswětluja nimo toho prašenja tworjenja identity a film, sfilmowanje literarnych předłohow, stereotypy we filmje a zwiski z indigenym filmowstwom. Rozmołwy z něhdyšimi sobudźěłaćerkami a sobudźěłaćerjemi produkciskeje skupiny zmóžnjeja rědke dohlady do dotal njeznateje praksy produkcijow a do zaběranja z jeničkej statnje připóznatej etniskej mjeńšinu w NDR. Na připołoženymaj DVDejkomaj so wažne twórby němsce a serbsce prěni raz zjawnosći spřistupnja.
Wudawaćelej
- Grit Lemke, dr. phil., promocija na polu europskeje etnologije, režiserka a kuratorka z ćežišćom za serbske a wuchodoněmske temy kaž tež za dokumentarne filmy a dokumentarnu literaturu
- Andy Räder, dr. phil., wědomostny sobudźěłaćer na Instituće za medijowe slědźenje na uniwersiće w Rostocku, promocija na polu medijoweje wědomosće na Filmowej uniwersiće “Konrad Wolf”
Foto na coveru
- žony w žarowanskej drasće w Slepjanskej parochiji, nahrawanske dźěła za film “STRUGA-wobrazy krajiny” (1972, Konrad Herrmann)
- copyright: Serbski Institut / Toni Bruk
