Rukopisaj Marjany Domaškojc Serbskemu institutej přepodatej
Dotal njeznatej rukopisaj delnjoserbskeje spisowaćelki Marjany Domaškojc dósta Serbski institut z priwatneho wobsydstwa wčera (7. meje) přepodatej.
Čestnohamtski stawiznar z Chmjelowa (Choćebuz), Frank Schreiber, je Serbskemu institutej přepodał manuskript wot Marjany Domaškojc z něhdźe 60 stronami. Jedna so wo dźiwadłowu hru “Šwickojc pytaju źowku”.
Zawostajenstwo spisowaćelki Marjany Domaškojc (1872-1946) ze Cazowa, kotrež chowa so w Serbskim kulturnym archiwje, je “jenož fragment”, zwěsći archiwarka dr. Annett Brězanec. A dale zdźěli: “Snadnuški kašćik wobjima horstku listow a literarne fragmenty. Wot dźiwadłoweje hry předležachu dotal jenož dwě rukopisnej stronje. Ćim wjetše je wjeselo, zo přepoda so nětko original dźiwadłoweje hry kaž tež list Domaškojc Minje Witkojc do archiwa.”
Prěni raz wozjewi so hra “Šwickojc pytaju źowku” w kulturnym časopisu Łužica w lěće 1932, jako kniha je wušła 1936. Tuta publikacija je tež jako wobraz a tekst online přistupna pod www.dolnoserbski.de/biblioteka/pokaz/domaskojc-swickojc-pytaju-zowku. 1956 wudachu so “Wubrane spise” Marjany Domaškojc. W tutym wudaću pak bě wudawaćel někotružkuli sadu rěčnje změnił. Nětko je nadawk archiwa, original wobchować a dalšemu přeslědźenju, na př. originalneje rěče, spřistupnić.
- we wirtuelnej čitarni Serbskeho instituta je krótki žiwjenjoběh a link k přehladej zawostajenstwa w SKA wozjewjeny: www.serbski-institut.de/archivbestand/domaskojc-marjana-1872-1946/
- lisćina wo zawostajenstwje (pdf-dokument)
