Rozprawa: Wědu šěrić. Skutkowanje Maćicy Serbskeje / Maśicy Serbskeje w 20./21. lětstotku

Maćica Serbska je hromadźe ze Serbskim institutom přeprosyła na konferencu z w nadpismje mjenowanym titulom, kotraž wotmě so 25./26. nowembra składnostnje 175. róčnicy załoženja serbskeho wědomostneho towarstwa w Budyskim Serbskim domje. Předsydka Maćicy Serbskeje dr. Anja Pohončowa witaše hosći na interdisciplinarnu konferencu, na kotrejž so referenća z tu- a wukraja z 15 přednoškami wobdźěli. W srjedźišću konferency steješe dźěławosć Maćicy po jeje wožiwjenju 1990/91. Wuzběhnychu so wosebje kolokwije stawizniskeje sekcije w 1990tych lětach, z kotrymiž je přinošowała k rozestajenju dotalneho serbskeho stawiznopisa a k nowym perspektiwam. Ale tež druhe Maćične cyłki, mjez druhim rěčnej komisiji abo sekcija ludowěda/muzejownistwo móža hač do dźensnišeho na aktiwnu dźěławosć zhladować. W poslednim bloku konferency diskutowachu přitomni wo wužadanjach do přichoda. Pokaza so, zo dyrbjała Maćica wo rozšěrjenju a wusměrjenju swojeho profila přemyslować, zo by tež w přichodźe dorost za sobudźěło dobyła. Diskusiju wo přichodnym wusměrjenju Maćičneje dźěławosće měli dale wjesć.

Cyłkownje wobdźěli so něhdźe 40 zajimcow. Předwidźane je publikowanje přinoškow w Małym rjedźe Serbskeho instituta.