Pućowaca wustajeńca “Swoboda kiwa! Serbja a mjeńšinowe prašenje po 1918” w Narodnym muzeju w Szczecinje
termin: 13.06.2024 - 19.07.2024
Městno zarjadowanja: Muzeum Narodowe w Szczecinie – Centrum Dialogu Przełomy, Plac Solidarności 1, 70-515 Szczecin
Sympozij z titulom “Wot Budyšina do Szczecina” běše wobstatk wotewrjenja wustajeńcy w Narodnym muzeju w Szczecinje, 13. junija 2024. Přednošowali su dr. habil. Piotr Pałys (Instytut Śląski), dr. Małgorzata Mieczkowska (Uniwersytet Szczeciński) a Michał Dłużak (Szczecin, Stowarzyszenia Polsko-Serbołużyckiego Pro Lusatia).
Wo wustajeńcy
“Swoboda kiwa”, rěka spočatk 1919 z wulkej nadźiju, jako so europska zemjepisna karta po skónčenju Prěnjeje swětoweje wójny znowa rjaduje. Pućowaca taflowa wustajeńca Serbskeho instituta prezentuje wjeršk serbskich narodnych prócowanjow mjez swětowymaj wójnomaj. Při tym stajane prašenja za kolektiwnym samopostajowanjom, za tolerancu a wurunanjom zajimow mjez mjeńšinu a wjetšinu su hač do dźensnišeho aktualne.
Wustajeńca je so spěchowała wot Ministerstwa za wědomosć, slědźenje a kulturu kraja Braniborska, wot Sakskeho statneho knježerstwa, wot Němsko-Čěskeho fonda přichoda/ Česko-německý fond budoucnosti a wot Załožby za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.