Digitalizaciski centrum

Wot spočatka 2024 natwarja Serbski institut Digitalizaciski centrum (DZ). Z tym ma so digitalizacija serbskeho kulturneho herbstwa při Serbskim insituće (SI) strukturelnje zakótwić.

Digitalizaciski centrum ma nošnu rólu w digitalizaciskej strategiji SI za serbske kulturne daty přewzać. DZ ma digitalizaciju swójskich wobstatkow (Serbskeho kulturneho archiwa, Serbskeje centralneje biblioteki) skutkownje spěchować, budźe perspektiwisce pak tež jako posłužbar skutkować. Hdyž DZ potom běžnje dźěła, chce relewantne wobstatki serbskeje kultury najwšelakorišich projektowych partnerow do digitalizatow přetworić a je zjawnosći digitalnje spřistupnić. Za to postajeja so standardy a workflow w zwisku ze Serbskim kulturnym registrom so etablěruje. W tuchwilnej fazy natwara (2024-2027) so skutkownosć DZ koncipuje a dźěłowe wotběhi za typiske objektowe skupiny so wupruwuja a wuhódnoća.

Předewzaće spěchuje so wot Załožby za serbski lud ze srědkow zwjazkoweho ministerstwa nutřkowneho a domizny na zakładźe wobzamknjenja Němskeho zwjazkoweho sejma (spěchowanska směrnica „Serbska rěč a kultura w strukturnej změnje“ za projekty w Swobodnym staće Sakskej).

Pozadk:

Nahladny wobstatk biblioteki a archiwa płaći jako wažna reprezentanca serbskeho kulturneho herbstwa. Z jeho digitalizaciju so fyzisce wohroženy podźěl za dodatne wužiwanje zawěsća a digitalnje spřistupnja. Tute digitalne spřistupnjenje wopřija nowe formy přistupa ke kulturnemu herbstwu, kaž digitalnu reprezentaciju, tekstualnu ekstraciju a dalewobdźěłanje, digitalne kuratěrowanje, digitalne zawěsćenje a dalše. Perspektiwisce ma so tež serbske kulturne herbstwo dalšich serbskich kulturnych zarjadnišćow zapřijeć (jako posłužba) – nimo typiskich wobstatkow biblioteki a archiwa kaž spisowna twórba, fotografija, film, awdijo-magnetowe banćiki, muzikalije atd. tež 3D-formy z muzejoweho wobłuka.

Spěchowarjo

Předewzaće spěchuje so wot Załožby za serbski lud ze srědkow zwjazkoweho ministerstwa nutřkowneho a domizny na zakładźe wobzamknjenja Němskeho zwjazkoweho sejma.