Přihotowanje internetoweho portala wo hornjoserbšćinje
Za delnjoserbšćinu steji wot lěta 2003 rěčny portal dolnoserbski.de/niedersorbisch.de online k dispoziciji, prěnjotnje jako platforma za prezentaciju Němsko-delnjoserbskeho słownika, kotraž so wot lěta 2010 postupnje wudospołnja z dalšimi poskitkami (retrodigitalizowane słowniki, tekstowy korpus, frazeologija, ortografiske prawidła). Jeho čiłe wužiwanje dopokazuje, zo dopomha tuta strategija koncentrowaneje prezentacije w Serbskim instituće nadźěłanych informaciskich resursow wo serbskej rěči k tomu, zo su wone w zjawnosći derje widźomne a skutkuja ćim lěpje so na dobro rěčneje praksy. W nalěću 2016 skići so Serbskemu institutej móžnosć, wotpowědnu internetowu adresu za hornjoserbšćinu (hornjoserbsce.de /obersorbisch.de ) přewzać. Projekt měri so na koncepcionelne přihotowanje a planowanje realizacije tutoho rěčneho portala, w kotrymž maja so nastawace (DOW) a hižo eksistowace žórła za tutu rěč (na př. frazeologiski słownik ) perspektiwisce na podobne wašnje zjimać a prezentować. Jako prěni modul spřihotuja a spřistupnja so 2018 rěčnokulturne přinoški rjada “Rěčny kućik”, kotryž wuhotuja A. Pohončowa, J. Šołćina a S. Wölkowa a kotryž wusyła so prawidłownje w serbskim rozhłosu.
Wuslědki
Wot oktobra 2018 online: Rěčne kućiki
Poskitk “Rěčnych kućikow” so lětnje wo přinoški předchadźaceho lěta rozšěrja, prěnja tajka aktualizacija dźěše w juliju 2019 online.
Na projekće wobdźěleni: Fabian Kaulfürst, Anja Pohončowa, Marcin Szczepański