Wučbna šćežka „Na serbskich slědach we Warnoćicach“

Warnoćicy su při čěsko-sakskej hranicy ležace čěske město. Štož Warnoćicy wot swojich susodnych městow wotzběhuje je wuznam, kotryž měješe městnosć w lětach 1945 do 1950 za wjacore sta Serbowkow a Serbow. Woni chodźachu tu do šule, dóstachu wukubłanje abo namakachu dźěłowe městno. Serbska zhromadnosć běše dźěl wobraza města. Žiwjenje we Warnoćicach formowaše zaso tych, kiž tu dźěl powójnskeho časa bydlachu. Dopomnjeće na tutón čas pěstuja we Warnoćicach kaž tež we Łužicy.

Zaměr projekta je zdźěłanje koncepta za kulturnohistorisku wučbnu šćežku přez Varnsdorf, kotraž stawizny Serbow we Warnoćicach, historiske pozadki kaž tež dopomnjeće na tute stawizny kritisce zarjaduje a šěrokemu publikumej nazornje sposrědkuje. Projekt so we wuskim zhromadnym dźěle z lokalnymi akterami koncipuje a zwoprawdźi.

Tutón projekt je dźěl interdisciplinarneho třěšneho projekta „Varnsdorfske časy“. Čěsko-serbski šulski kubłanski projekt w konteksće powójnskeho časa 1945-1950.

Spěchowarjo

Projekt so spěchuje wot Załožby za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot Zwjazkoweho sejma, Krajneho sejma Braniborskeje a Sakskeho krajneho sejma.

 

Spěchowane wot Němsko-Čěskeje załožby přichoda.