Wohroženy abo strašny? K zawěsćenju nutřkowneje mjeńšinoweje politiki w mjezywójnskim času Němskeje

Kónc Prěnjeje swětoweje wójny bě wuznamna cezura w stawiznach mjeńšinow, małych ludow a njedominantnych etniskich skupinow po cyłej Europje.
Změny politiskeje geografiskeje karty po lěće 1918 nuzowachu tež němski stat k wuwiću koherentneje mjeńšinoweje politiki, a to hladajo na němske mjeńšiny we wukraju kaž tež narodne mjeńšiny w tukraju. Wobě jednanskej poli, tak mjenowana (wonkowna) “ludowa politika” kaž tež nutřkowna mjeńšinowa politika Němskeho reicha, plećeštej so často w praksy .

Zaměr projekta je strukturnostawizniske přepytowanje “serbskeje politiki” w konteksće powšitkowneje nutřkowneje a wonkowneje mjeńšinoweje politiki Němskeho reicha a jeho krajow po lěće 1918. Fokus leži na institucionelnych zakładach a mechanizmach tuteje politiki, kotrež maja so we wobłuku wjacepłoninoweje analyzy na krajnej, reichskej a supranacionalnej runinje wopisać. Wosebita kedźbnosć słuša w lěće 1920 wot reicha, Pruskeje a Sakskeje załoženemu a wokrjesnemu hejtmanstwu Budyšin jako słužbnemu zarjadej přirjadowanemu “Wendenabteilung”, kotrejež nadawk bě pozdatne separatistiske a irredentistiske prócowanja w Serbach politisce dohladować.