Serbske digitalne swěty: přeslědźenja kultury a technologije w 21. lětstotku

Načasna kultura je přez wšudźomnosć digitalnych technologijow we wšěch žiwjenskich wobłukach charakterizowana. Slědźenje zetkawa so tutej wobstejnosći na jednej stronje přez postajenje specifiskich přiznamjenjow “digitalnych kulturow” a na druhej stronje přez wopisanje wuskutkow digitalnych technologijow na kulturnu praksu. Za serbsku kulturu so tajke prašenja dotal adresowali njejsu, byrnjež digitalizacija tu hižo po lětach njesnadny wuznam hrała a mjeztym tež serbsku digitalnu kulturu wutworiła.

Zaměr projekta tuž je, přez digitalne technologije wuwabjene změny serbskeje kultury přepytować, a při tym k teoretizowanju serbskeje digitalneje kultury přinošować . Projekt formuje so k jednomu na wuskutki digitalneje technologije a wašnja kak so serbska kultura generěruje, konceptualizuje a dale dawa, a k druhemu na wšelakore faktory, kotrež tworja wuwiće serbskich digitalnych wobsahow, software-nałožowanjow a platformow. Projekt zwjazuje teoretiske kubłanje z empiriskim slědźenjom we Łužicy a online-slědźenjom serbskich komjunitow, syćow a platformow. Cyłkownje budźe projekt ke wuwiću slědźenja serbskeje digitalneje kultury kaž tež k etiskemu wuhotowanju projektow digitalizacije přinošować.

Wuslědki maja so w monografiji wozjewić. Projekt je zdobom do habilitaciskeho projekta zapołoženy, kotryž projektowa wobdźěłarka na Braniborskej techniskej uniwersiće slěduje.