Serbska politika w NDR. Struktury, akterojo a zajimy 1968–1989 (projekt třećich srědkow)

Projekt fokusěruje z dobu 1968 do 1989 poslednjej lětdźesatkaj SED-knjejstwa a měri so na analyzu serbskeje politiki hladajo na centralne politiske direktiwy a jich lokalne zwoprawdźenje. W srjedźišću steji prašenje, kak zetkawachu so w němsko-serbskej kónčinje ludźo z rozdźělnych kulturow, kotrež so nimo toho stajnje změnjachu.
Kulturne změny maja so runje tak analyzować kaž statne organy a institucije a relewantnych akterow narodnostneje politiki w NDR a jich zajimy.
Z forsěrowanym wutwarom Choćebuskeho wobwoda na wuhlowy a energijowy centrum NDR wjedźeše so přetworjenje Łužicy dale. Při tym wostachu prašenja integracije kulturneje diferency do wuhotowanja zhromadneho žiwjenja w dwurěčnym teritoriju podrjadowane. Pokročowace urbanizowanje, falowace inwesticije do wsow, zazyglowanje krajinow a zničenje ekosystemow flankěrowachu industrializaciju. Jako sćěh wotbagrowanja wsow a indiwidualnych nazhonjenjow diskriminacije dla zhubichu so njezadźeržomnje serbske elementy ze wšědneho dnja ludźi.

Zajim slědźenja měri so na přesadźenje politiki, kotraž oficialnje “zachowanje prawow serbskeje ludnosće” propagowaše, na jeje koncepciju a praksu. Kak poradźi so po lěće 1968 dalše zawjazanje serbsce rěčaceje ludnosće do socialistiskeho natwara? W projekće so za zhromadnosćemi a konfliktami mjez Serbami a Němcami generelnje praša, ale tež za tajkimi mjez funkcionarami, přisłušacymi wšelakim institucijam.

Mjez wotmołwami na prašenje za hłownej konflikitnej liniju mjez Serbami a Němcami ma so na prěnim městnje marxistiska ideologija mjenować. SED-funkcionarojo dyrbjachu naležnosće serbskeje kultury a rěče druhim zajimam podrjadować, hačrunjež pytnychu, zo so ze stron cyrkwjow wažnosć na wysoke hódnoćenje serbskich tradicijow přepołoži. Jich swětonahlad staješe politisko-ekonomiske zaměry do srjedźišća. Kak postupowachu woni přećiwo wot wobeju konfesijow žadanemu sobuskutkowanju při zakitowanju serbskeje identity? Wurosćachu z regionalnje rozdźělnych skutkownych faktorow socialnych, ekonomiskich a ekologiskich ramikowych wuměnjenjow charakteristiske wotchilenja w transformaciskich procesach přewažnje ewangelskich Serbow Delnjeje Łužicy a serbskich katolikow w Hornjej Łužicy?
Tute a druhe problemy maja so w běhu třoch lět přepytować.

Spěchowarjo

Tutón projekt spěchuje so přez dawkowe srědki krajneho etata wobzamknjeny wot Sakskeho krajneho sejma.