Filmiske reprezentacije etniskich mjeńšin. Přirunanje předstajenja indigeneje identity w filmje na mjezy-, narodnej a europskej runinje

Kultura, komunikacija a identita steja w mjezsobnym zwisku: Bjez kultury njeby było komunikacije a bjez komunikacije nic kultury. Tež wutworjenje identity by wuzamknjene było, wšak so tuta formuje w stajnym přirunanju swójskeho a cuzeho kulturneho zarjadowanja. Masowe medije so do tutoho zwiska zapletu, wšak posrědkuje so wěda a měnjenja wo cuzych kulturach husto přez medije; wone móža kultury přesahowacu a transkulturelnu skutkownosć spěchować. Tak wukonja medialna konstrukcija kultury wliw na to, kak so čłowjek sam a kak so wot druhich zaznawa, a wuskutkuje so na wuwiće swójskeje kulturneje identity.
Medij film – jako historisce zrosćena wuměłska a masomedialna forma komunikacije – přewozmje wažne nadawki reprezentacije, předźěłanja a wudiferencowanja wšelakich tematikow zjawneho žiwjenja. Film interagěruje z publikumom a je tohodla wobstatk towaršnostneho poměra komunikacije a interakcije. Wón funguje jako nošer woznamow, kotryž dóstanje přez připisanje woznama a přez dožiwjenske struktury zmysł. Masowy medij film njeje tuž jenož instrument za tworjenje identity, ale tež špihel towaršnostneho ducha časa.
Zakład disertaciskeho předewzaća je prašenje za wuznamom filmiskich reprezentacijow etniskich mjeńšin a jich wliw na wutworjenje identity a namakanje městna w towaršnostnej strukturje. Z pomocu recepcisko-estetiskeje analyzy filmow ma so na přikładźe wuzwolenych filmow předstajenje indigeneje identity a tohorunja indigenerych poměrow – tež w jich časowym přeběhu – w serbskim, w samiskim a Maori-filmje přepytować a napřećostajić.
Promotorka disertacije je prof. dr. Elizabeth Prommer, Institut za medijowe slědźenje na uniwersiće w Rostocku.