Přednošk (5.10.): Na žanrach bazowaca wučba a curriculum design w “Multiliteracies Framework”. Perspektiwy za zdźerženje a rěčnodidaktiske sposrědkowanje serbskeju rěčow.
termin: 05.10.2023 16:00 - 17:30 hodź.
Městno zarjadowanja: Wotrjad za regionalne wuwiće a škit mjeńšin, Při hrodowej cyrkwi 2, 03046 Choćebuz
Přednošowacy:
dr. Emily Barthold (BTU Choćebuz/Zły Komorow), dr. Willi Wolfgang Barthold (TU Drježdźany)
Znata je Emily Barthold w Delnjej Łužicy jako spěwarka (Siggiko), kotraž so zhromadnje ze swojim mandźelskim dr. Willi Wolfgang Barthold jara za serbsku kulturu angažuje. Mjenje znate je, zo staj wobaj na Georgetown University we Washingtonje DC, USA, promowałoj a zo staj so tam wosebje w didaktice cuzych rěčow kwalificěrowałoj.
Dr. Emily Barthold skutkuje tuchwilu w rěčnym centrumje BTU Choćebuz/Zły Komorow we wobłuku “němčina jako cuza rěč” (DaF). Dr. Willi Wolfgang Barthold je wědomostny sobudźěłaćer na katedrje “Zapadnosłowjanska literarna a kulturna wědomosć” Techniskeje uniwersity Drježdźany. Z tutym přednoškom předstajitaj a diskutujetaj prěni raz swoje fachowe kompetency a ideje w serbskim (praktiskim) konteksće.
wo přednošku:
Přednošk chce pokazać, kak zamóže eficientne sposrědkowanje serbskeju rěčow za dorosćenych wuknjacych z pomocu inowatiwneho curriculuma k rewitalizaciji rěče přinošować. Při tym zawjedźe zakłady genre- a literacy-bazowaceje rěčneje didaktiki. Předstaji z pomocu přikłada z praksy konkretne wuwučowanske metody a principije zarjadowanja wučbnych materialow, kotrež móža za wudźěłanje, na wosebite potrjeby serbskeju rěčow přiměrjeneho, curriculuma směrodajne być.
Jedna so wo zarjadowanje wotrjada za Regionalne wuwiće a škit mjeńšin (delnjoserbsce: Regionalne wuwiśe a mjeńšynowy šćit – RegMje) Serbskeho instituta. Je to prěni přednošk w rjedźe „Regmje pśepšosyjo“ wotrjada na nowym stejišću. W njeprawidłownych wotstawkach so zajimawe temy předstajeja a diskutuja.