Technology meets language – Předčitanska funkcija za delnjo- a hornjoserbšćinu
Městno zarjadowanja: Serbski muzej, Hród 3, 02625 Budyšin
Přednošk Lechosława Jocza Ph.D., Jana Měškanka a dr. Astrid Schmiedeloweje, z mnoho přikładami za słuchanje.
Přednošk předstaja wuslědki projekta za delnjo- a hornjoserbsku předčitansku funkciju Serbskeho instituta. Słyšeć budźetaj wobaj předčitanskaj hłosaj Matej (hornjoserbsce) a Juro (delnjoserbsce). Budźe so pokazować na techniske wosebitosće při tworjenju tuteju serbskeju rěčneju modelow za syntezu z open source systemom MaryTTS a dale na planowane k dispoziciji stajenje systemow syntezy jako plugin. Nimo toho naspomnja so hižo móžne a potencielne nałožowanske pola předčitanskeje funkcije (na př. w zjawnych busach abo ćahach za připowdźenje přichodneho zastanišća, booki-pisak, screenreader, jako podpěra za ludźi z čitanskej a prawopisnej słabosću (LRS)).
Nimo toho předstaja so wuslědki wusko z projektom zwjazanych fonetiskich/fonologiskich slědźenjow a zezběranych slědźenskich datow. Tak wobswětleja prěni raz z načasnej technologiju a metodologiju staw delnjo- a hornjoserbskeho wurjekowanja, a to z přikładom a z dalšimi pokiwami na hižo eksistowace a planowane wědomostne publikacije.
Projekt wuwića předčitanskeje funkcije a zwjazane slědźenje so sobu financuje z dawkowych srědkow na zakładźe hospodarskeho plana, wobzamknjeneho wot Sakskeho krajneho sejma.
Dalše informacije wo projekće:
- testowa wokolina aktualneje wersije serbskeju předčitanskeju hłosow Jura a Mateja (tuchwilu we finalnym pruwowanju)
- projektna stronka wědomostneho projekta
- nowinske informacije: Serbska předčitanska funkcija předstaji so na mjezynarodnym kongresu w Praze (20.7.2023), Prěnja wersija serbskeju předčitanskeju funkcijow (23.1.2023)
Zarjadowanje w rjedźe zjawnych přednoškow Serbskeho instituta na kromje lětnych posedźenjow wědomostneje přirady.
Plakat a internetowe bannery (kwadratiski, prěčny format)
