Personalna změna w rěčespytnym wotrjedźe w nalěću 2022

43-lětna Serbowka Leńka Šołćic wuwučuje a slědźi tučasnje jako wyša asistentka na Słowjanskim seminarje uniwersity w Zürichu. W lěće 2008 spožči jej město Konstanz disertaciske myto za doktorske dźěło “Das grammatische System der obersorbischen Umgangssprache unter besonderer Berücksichtigung des Sprachkontakts”. Jeje slědźerske ćežišća su mjez druhim rěčne kontakty, wosebje słowjanskich mjeńšinowych rěčow, werby pohiba we słowjanskich rěčach a gramatiske kategorije hornjoserbšćiny. Žiwa je tučasnje w Konstancu, hdźež studowaše wot 1996 do 2002 slawistiku a germanistiku. Jako slawistka a germanistka dźěłaše na uniwersitach w Konstancu, Baselu (Šwicarska) a Zürichu.

Hižo za dźěło na swojej disertaciji přebywaše Leńka Šołćic chwilu w Serbskim instituće. Nimo wědomostneho poradźowanja přez Sonju Wölkowu staji jej institut dialektalne nahrawanja z katolskeje Hornjeje Łužicy za jeje dźěło k dispoziciji.

Wotkaz k cyłemu žiwjenjoběhej: https://slav.uzh.ch/de/seminar/mitarbeitende/sprachwiss/lenkascholze.html

Scholze, Lenka: Das grammatische System der obersorbischen Umgangssprache unter besonderer Berücksichtigung des Sprachkontakts. Konstanz 2007. elektroniske wozjewjenje: http://www.ub.uni-konstanz.de/kops/volltexte/2007/3221 (hlej elektroniski katalog uniwersitneje biblioteki Konstanz).

Regularne gremijowe posedźenja

Wědomostna přirada schadźuje so – lětsa znowa wirtuelnje – dnja 24. a 25. nowembra ze Serbskim institutom. Posledni wopyt přirady wotmě so w septembrje składnostnje ewaluacije, kotrejež wuslědki so w nalěću předstaja. Zjawny přednošk, na kotryž Serbski institut tradicionelnje na prěnim wječoru posedźenjow přeprošuje, dyrbješe so lětsa aktualnych wobstejnosćow dla znowa wotprajić.

Njewotwisna wědomostna přirada poradźuje kuratorij a předsydstwo instituta we wšěch wažnych wědomostnych a organizatoriskich naležnosćach. Přirada wudźěła namjety a doporučenja k wobdźěłanym slědźerskim wobłukam a k planowanju, wosebje k lětnemu dźěłowemu planej a k dźěłowej rozprawje předsydstwa. Za to přewjedźe so lětnje plenarne posedźenje a wuradźowanja z wotrjadami. Wědomostna přirada hódnoći dale (prawidłownje w štyrilětnym rytmusu) slědźerske wukony a dźěłowe plany instituta w pisomnej rozprawje.