Nowy wobstatk w digitalnym archiwje: Digitalna wersija noweje ewangelskeje Kemšaceje knihi
Digitalnu wersiju noweje ewangelskeje Kemšaceje knihi je spočatk tydźenja (4.3.2024) superintendent n. w. Jan Malink Serbskemu institutej přepodał.
“Wjeselimy so jara přez nowy wobstatk za naš digitalny archiw. Je to drohotna resursa, kotraž móhła so na přikład tež za tekstowy korpus hornjoserbskeho rěčespyta dale wužiwać”, zdźěli Wito Bejmak, nawoda Serbskeje centralneje bilbioteki a Serbskeho kulturneho archiwa. Wobsah digitalneje Kemšaceje knihi wotpowěduje ćišćanej knize, wudatej w lěće 2023. Wudospołnjene su nětko wotkazy, kotrež wolóža pytanje za tekstami a słowami kaž tež kopěrowanje za swójske wužiwanje.
Kemšaca kniha wobsahuje wšitke teksty, kotrež so prawidłownje na ewangelskich kemšach wužiwaja. Je to wjace hač 600 wotrězkow z biblije, kemšaca liturgija a něhdźe 150 modlitwow. Zakład za wšitke bibliske čitanja je přełožk biblije z lěta 1728, tola su so dotalne rewizije runje tak wobkedźbowali kaž dźensniše teologiske spóznaća a načasne normy hornjoserbskeje rěče. Wona wobsahuje 558 stron a wjac hač 130 000 słowow. Projektny nawoda za nowe wudaće z lěta 2023 bě serbski superintendent n. w. Jan Malink.
- wirtuelna čitarnja, z přehladom wobstatkow Serbskeho kulturneho archiwa a Serbskeje centralneje biblioteki
Kemšaca kniha: bibliske čitanja na Božich słužbach, kemšacy porjad a modlitwy w hornjoserbskej rěči / redakcija: sup. n. w. Jan Malink (nawod), Marka Maćijowa, f. Jadwiga Malinkowa (1. nakład; Hodźij: Serbski Wosadny Zwjazk, 2023).
