Nowa kniha wo stawiznach Maćicy Serbskeje po 1990 wušła

Maćica Serbska, załožena w lěće 1847 w Budyšinje, je najstarše serbske towarstwo z bohatymi stawiznami. Ze swojim wobnowjenjom po politiskim přewróće 1989/90 staji sej mjez druhim nadawk, wědomostnu zaběru ze stawiznami, rěču a kulturu Serbow spěchować a sorabistisku wědu šěrić.

Na mjezynarodnej konferency »WĚDU ŠĚRIĆ · WISSEN SCHAFFEN · WĚDU ŠYRIŚ« 25. a 26. nowembra 2022 składnostnje 175. róčnicy dozałoženja Maćicy Serbskeje wěnowachu so referentki a referenća z tu- a wukraja wosebje wožiwjenju a dźěle towarstwa tutoho časa.

Předležacy zběrnik pod titulom „Wědomosć za wšitkich. Maćica Serbska / Maśica Serbska po 1990“ dokumentuje wobšěrne skutkowanje Maćicy Serbskeje / Maśicy Serbskeje w zašłych 30 lětach a zdobom wuslědki konferency w lěće 2022. Z tym wudospołnja w lěće 1997 wudatu knižku „Trać dyrbi Serbstwo“ wo staršich stawiznach towarstwa.

Jako 38. zešiwk wuńdźe zběrnik z přinoškami 18 awtorkow a awtorow w Małym rjedźe Serbskeho instituta. Wudawaćelki – dr. Anja Pohončowa, dr. Theresa Jacobsowa a dr. Ines Kellerowa – su sobudźěłaćerki Serbskeho instituta a zdobom čłonki Maćicy Serbskeje.

zešiwk: A5-brošura, 196 stronow; 61 wobrazow/grafikow
nakład: 200
lěto wudaća: 2024
ISBN: 978-3-948166-89-2 (ćišć), ISBN: 978-3-948166-88-5 (digital)
płaćizna za ćišćany zešiwk: 12 eurow
URL: www.serbski-institut.de/os/publikation/maly-rjad-zesiwk-38/

Nakup publikacije je w Serbskim instituće móžny. Kontakt: Dwórnišćowa 6, 02625 Budyšin, si@serbski-institut.de.