Serbska centralna biblioteka wobdźěli so na cyłoněmskej “Nocy bibliotekow”
Pjatk, 4. apryla 2025 wobdźěli so Serbska centralna biblioteka (SCB) na cyłoněmskej Nocy bibliotekow. Nóc wotměje so pod motom „wědu dźělić a sej wotkryć” (“Wissen.Teilen.Entdecken”) w Serbskim instituće na Dwórnišćowej 6 w Budyšinje. SCB wotewri swoje durje, informuje wo swojej dźěławosći, móžnosćach rešeršowanja a wužiwanja a poskići krótke čitanja na njewšědnych městnach w domje.
Nóc zahaji so we 18.00 hodź. z wotewrjenjom kabinetneje wustajeńcy k dźěławosći Lusatia nakładnistwa. Šěroki repertoire nakładnistwa so prezentuje, knihi móža so na městnje wobhladać a wězo tež wupožčować. Zawostajenstwo nakładnistwa je we wobsydstwje SCB a Serbskeho kulturneho archiwa (SKA).
Dale předstaji dr. Robert Lorenc Mukowu “Statistiku łužiskich Serbow” z lěta 1886 (w němskej rěči). Sćěhuja krótke a zabawne čitanja powědkow, krimijow a lyriki, prěki a podłu našich wobstatkow, w serbskimaj rěčomaj a němsce. Čitaja Madleńka Šołćic, Měrćin Wjenk, Anja Pohončowa a Měrana Cušcyna.
Wopytowarjo móža sej originalne wudaće Noweje doby narodninskeho dnja sobu domoj wzać (lětniki 1956-1970, po poskitku) kaž tež antikwariske knihi.
W sydarni předstaji młode towarstwo “Serbska murja” swoje wideja k serbskim stawiznam a přeprošuje zajimcow so w hrě “QuizSerb” wubědźować.
Serbska centralna biblioteka bu załožena w lěće 1949. Jeje hłowny nadawk je zběrać wšu literaturu w serbskej rěči, wo Serbach a wo Hornjej a Delnjej Łužicy, w zmysle narodneje biblioteki. Zakładny wobstatk biblioteki twori zbytk knihownje Maćicy Serbskeje. Tutón wobstatk historiskich knihow je so wudospołnjał přez nakup resp. darjenje priwatnych knihownjow serbskich wótčincow. Z časa załoženja w lěće 1958 podpěra Ludowe nakładnistwo Domowina z winowatostnymi eksemplarami Serbsku centralnu biblioteku. Přez wuměnu z tu- a wukrajnymi institucijemi wobsedźi nahladny wobstatk slawistiskich a słowjansich knihow a časopisow. Serbska centralna biblioteka je zdobom wědomostna biblioteka Serbskeho instituta.
1992 załoži literaturowědnik a lektor dr. Frank Stübner nakładnistwo Lusatia. Jeho najznaćiša edicija bě woblubowany „Oberlausitzer Hausbuch“, němski pendant „Serbskeje protyki“, kotrehož prěni lětnik bě dr. Stübner hišće w LND wudał. Koncept nakładnistwa bě, wudać literaturu za Hornju Łužicu a namjezne kónčiny. Wot wšeho spočatka wěnowaše so tež w němskej rěči serbskim wobsaham kaž informacijam wo Serbach a jich wosebitosćam. 2017, w 25.lěće nakładnistwa, zemrě nakładnik a dźěło nakładnistwa so njejapcy skónči.
kontakt: Anna Měrćinowa,