Namakanka: Rukopisne serbske spěwarske w Awstralskej wotkryte

Historikarka a rěčespytnik Serbskeho instituta přepytujetaj dotal njeznaty rukopis, kotryž je so w awstralskim archiwje jako serbski identifikował. Wuslědki přepytowanja so w běhu lěta zjawnosći předstaja (SI sčasom informuje).

Kónc lěta 2021 wobroći so wjednica lutherskeho archiwa Awstralskeje w Adelaide Rachel Kuchel (Lutheran Archives) z wulkej překwapjenku na Serbski institut. We wobstatku swojeho archiwa běchu namakali rukopisnu serbsku knihu. Tuta bě so prjedy jako čěska woznamjeniła, nětkle pak přez zbožowny připad jako serbska spóznata.

Kniha wobsahuje na 107 stronach 27 hornjoserbskich rukopisnych kěrlušow. Najdlěši z nich wopřija 20 štučkow, při čimž je rukopis jara čisty a ćišćej napodobnjeny. Knize přiwjazanej stej prěnje wudaće misionskeje nowiny Handrija Palmana z lěta 1817 a ćišć kěrlušow z lěta 1802, kotryž w bibliografiji serbskeje centralneje biblioteki zapisany njeje. Prawdźepodobnje je kniha tuž na započatku 19. lětstotka nastała a bu wot serbskich wupućowarjow sobu do Awstralskeje wzata. Wobsedźer knihi a jeje puć do lutherskeho archiwa w Adelaide pak so hižo zwěsćić njedadźa.

“Rukopisne spěwarske skića jónkrótny dohlad do swěta pobožnych Serbow, kiž sej swoje teksty a kěrluše sami přełožowachu a zestajichu – a do noweho swěta sobu wzachu. Zdobom je rukopisna kniha zajimawy swědk serbskeho pismowstwa na mjezy mjez rukopisom a ćišćom,” zwěsći dr. Lubina Malinkowa, historikarka w Serbskim instituće. Wona přepytuje knihu zhromadnje z dr. Fabianom Kaulfürstom z rěčespytneho a stawizniskeho wida. Wuslědki budu so w běhu lěta zjawnosći we Łužicy a Awstralskej prezentować.