Na mjezynarodnym lětnim kursu za serbsku rěč a kulturu wobdźěla so zajimcy wot Japanskeje přez Benin hač do Texasa
Jutře wječor (22. julija) zahaji so lětuši mjezynarodny Lětni kurs za serbsku rěč a kulturu Serbskeho instituta, kotryž wotměwa so hač do 6. awgusta w Budyšinje. Z 52 wosobami su wšitke městna wobsadźene. Zajimcy přińdu z Benina, Čěskeje republiki, Francoskeje, Italskeje, Japanskeje, Pólskeje, Ukrainy, USA a wězo tež z Němskeje. Prěni króć přileći cyła skupina potomnikow serbskich wupućowarjow z Texasa na kurs. Wosebite je tež, zo wobdźěleja so wjacori Kašubojo na dwutydźenskim poskitku.
Dale su mjez wobdźělnikami studenća slawistiki, přećeljo Serbow z Ćěskeje kaž tež Łužičenjo, kotřiž chcedźa sej “zabytu” maćeršćinu swójby zaso přiswojić. Serbski institut zwěsća jasny trend, zo so (wšelakich přičin dla) podźěl slawistow na kursu zniža. Něhdźe pjećina kursantow, kotřiž su mjez 20 a 75 lětami stari, so wospjetnje na kursu wobdźěli.
Dr. Fabian Kaulfürst, rěčespytnik w Serbskim instituće a hłowny zamołwity a organizator kursa: “Z cyłej wutrobu so wjeselu, zo móžemy kurs lětsa zaso přewjesć. Před dwěmaj lětomaj wšak dyrbjachmy poskitk korony dla wotprajić, byrnjež bě wjele zajimcow. Bohudźak pytnjemy, zo je zajim konstantnje wysoki. Wosobinsce so přez wuknjenske wuspěchi kóždeho kursanta wjeselu. Najlěpje za nas Serbow wšak su wězo ći, kotřiž wostanu tež po kursu z našim ludom a našej rěču zwjazani. Někotři něhdyši wobdźělnicy dźě mjeztym we Łužicy dźěłaja, tež pola nas w Serbskim instituće, abo nětko samo serbšćinu podawaja. Tak wuwučuje lětsa na přikład Syman Blum jednu skupinu.”
Nimo wšědneje wučby a konwersacije wočakuje kursistow pisany program přednoškow, ekskursijow (po ewangelskej Hornjej Łužicy a do katolskich Serbow) a kulturnych zarjadowanjow. Tak přednošuja mjez druhim wědomostnicy Serbskeho instituta wo wobchadnej serbšćinje w katolskej Hornjej Łužicy (Leńka Šołćic), Připołdnicy (Susanne Hozyna), serbskej narodnej drasće (Ines Kellerowa), Warnoćanskej generaciji (Jana Piňosová) a wuznamje Ochranowa za Serbow (Lubina Malinkowa). Anja Pohončowa rozprawja, tule jako předsydka Maćicy Serbskeje, wo stawje diskusije nastupajo serbsku hymnu a Jan Breindl rěči wo nazhonjenjach wučerja čěšćiny w Serbach. Tež zhromadne spěwanje, reja a hry steja na programje.
Na kóncu maja wobdźělnicy šansu, sej certifikat po mjezynarodnym referencnym ramiku w stopnjach A1, A2, B1, B2 zdobyć. Tu dźakujemy so Rěčnemu centrumej WITAJ, kotryž wotpowědne pruwowanja zwonka poprawneho plana přewjedźe.
“Mjezynarodny lětni kurs za serbsku rěč a kulturu Serbskeho instituta zrozumimy tež jako spěchowanje akademiskeho dorosta we Łužicy, kotrež wuprudźi mjeztym do cyłeho swěta. Je to zdobom rjane wudospołnjenje stipendiatoweho programa Załožby. Tež lětsa zaso wobdźěli so přichodna stipendiatka na kursu. Nimo sposrědkowanja rěčnych kmanosćow dóstanu wobdźělnicy dohlady do wšelakich sorabistiskich slědźerskich temow”, zwěsći dr. Susanne Hozyna, zastupowaca direktorka Serbskeho instituta.
Fabian Kaulfürst: “Wjeselu so, zo mamy lětsa zaso dobry miks nazhonitych wučerjow a nowačkow. Njehladajo na wosebite wužadanja, kotrež lětsa mějachmy, smy dosć zahoritych ludźi namakali, tak zo móžemy kurs w pjeć skupinach přewjesć. Móžu to studentam wučerstwa, wosebje wězo serbšćiny, tež za přichodne lěta cyle sprawnje poručeć: Wuwučowanje pola nas na kursu je wulkotne přihotowanje za praksu z přewšo motiwowanymi wobdźělnikami. Wužijće ju.”
Dnjowy wotběh
9.00-11.30, wučba
11.45-12.30, přednošk abo poskitk (na př. serbski film)
13.45-14.30, konwersacija
wot 15.00, popołdniša zaběra (na př. spěwanje abo zeznaće Budyšina)
ca. 19.30, wječorna zabawa (na př. hry, ludowe reje abo přednošk)
Ekskursiji
- njedźelu, 24.7., (hłownje) do ewangelskeje Hornjeje Łužicy ze stacijemi Zahor, Korzym (wuměłska galerija), Plusnikecy, Malešecy, Łaz, Rakecy a Radwor
- njedźelu 31.7., do katolskich Serbow ze stacijemi Chrósćicy, Smječkecy, Nowa Wjeska, Ralbicy, Wotrow a Kukow
