Mjezynarodny lětni kurs za serbsku rěč a kulturu – rozprawa wobdźělnicy z wobrazowej galeriju

Awtorka přinoška je Marleen Schindler, wobdźělnica kursa a studijna praktikantka w Serbskim instituće.

Wot 22. julija hač do 6. awgusta 2022 wotměwaše so w Budyšinje mjezynarodny lětni kurs serbskeje rěče a kultury z wobdźělnikami z cyłeho swěta (hlej medijowa informacija wot 21. julija). Po kursu prošachmy jich wo krótki feedback. Někotre wujimki tule předstajimy.

Přeco zaso bě za čas lětnjeho kursa słyšeć słowo: palenc! Jako žortne hesło a titul jednoho z najwoblubowanišich serbskich spěwow přewodźeše wone słowo rjany zhromadny čas. Kursisća dopominaja so rady na spěwanje serbskich ludowych spěwow, nazwučowanje rejow, hotowanje serbskeje drasty a pisany wječorny program. Jasny highlight běše wječor z “Lózymi hólcami”.

Wosebje rjanej běštej njedźelskej ekskursiji. Najprjedy wuslědźichu ewangelsku kónčinu wokoło Budyšina a serbski superintendent na wuměnku Jan Malink skićeše zajimawy dohlad do jeje stawiznow. Druhu njedźelu slědowaše potom ekskursija po katolskej Łužicy. Po dnju połnych dožiwjenjow přeprosychu Kaulfürstec mandźelskaj wobdźělnikow na kofejpiće do swojeje zahrody.

Wuspěch kursa bě předewšěm ze zasadźenjom sobudźěłaćerjow Serbskeho instituta zwjazany. Wosebje Fabian Kaulfürst je jako hłowny zamołwity a narěčenska wosoba kurs intensiwnje přewodźał a steješe wobdźělnikam stajnje z radu a skutkom poboku. Hnydom wjacori kursisća wuzběhnychu a chwalachu “ANGAŽEMENT Fabiana”.

Přiwšěm měli so w přichodźe wšelake wěcy polěpšić. Wobdźělnicy přeja sej na přikład za mnohe zajimawe přednoški lěpje organizowane simultane tołmačenje, zo bychu wšitko derje zrozumili. Mjeztym, zo so dobra nalada we wučbje a konwersaciji chwaleštej, wustupowachu přez rozdźělny rěčny niwow druhdy problemy. Standardizowany zastopnjowanski test na spočatu kursa (přidatnje k dotalnemu swójskemu posudźowanju rěčnych kmanosćow) móhł tomu zadźěwać, tak namjet wobdźělnika. Nimo toho přejachu sej někotři trochu mjenje wobšěrny program, zo bychu so lěpje na wučbu a domjace nadawki koncentrować móhli a při tym napjate přednoški a kulturne aktiwity skomdźić njetrjebali.

Kurs, tu běchu sej wobdźělnicy přezjedni, chcedźa wšitcy dale doporučić, dokelž: “W tutym kursu sy wot serbskeje rěče a kultury wobdaty. A tak móžeš rěč najlěpje wuknyć.”

• dalše, powšitkowne informacije ke kursej