Ludźo z cyłeho swěta chcedźa serbsce wuknyć

Hižo 25 přizjewjenjow z 8 krajow je za Lětni kurs za serbsku rěč a kulturu w Budyšinje dóšło (staw: apryl 2022). Nimo zajimcow z Čěskeje, Pólskeje a Němskeje chcedźa so tež ludźo z Francoskeje, Italskeje, ale tež z Benina a Japanskeje na kursu wobdźělić. Z tym je hižo połojca městnow wobsadźena.

Serbski institut zarjaduje lětsa wot 22. julija do 6. awgusta Lětni kurs za serbsku rěč a kulturu, kotryž so kóžde druhe lěto wotměwa (w lěće 2020 dyrbješe so koronapandemije dla wotprajić). Wosebje za kursantow z USA, potomnikow serbskich wupućowarjow, planuja lětsa tež jendźelskorěčne wuwučowanje. Nimo wučby hornjoserbšćiny skići Serbski institut tež zaso přewodny program z ekskursijemi a wobšěrnym rjadom serbowědnych přednoškow.

Dalše informacije a online formular k přizjewjenju, hlej https://www.serbski-institut.de/os/letni-kurs/.