Lětopis: Nowe přinoški online wozjewjene. Ćišćany zběrnik 2023 wušoł.
Lětopis – Časopis za sorabistiku a přirunowace mjeńšinowe slědźenje
Zběrnik „Lětopis – Časopis za sorabistiku a přirunowace mjeńšinowe slědźenje“ je ze zhromadźenymi přinoškami lěta 2023 w ćišćanej formje wušoł. Zajimcy móža sej jón w Smolerjec kniharni kupić abo skazać. Jednotliwe přinoški su dale online přistupne (open access). Archiw ze zańdźenymi wudaćemi so přihotuje. Nimo toho su so w minjenym času wjacore nowe přinoški wozjewili pod www.lětopis.de.
Nowe přinoški online
Jedna so wo rěčespytnej přinoškaj wot Thomasa Menzela wo rěčespytnych aspektach gender-sensibelneje rěče a genderowych stereotypow, nekrolog za prof. dr. Helmuta Fasku wot Sonje Wölkoweje, recensiju wot Jessica Bock (Birgit Sack: Maria Grollmuß 1896‒1944. Biografische Annäherung und Erinnerungsnarrative. Göttingen: Wallstein Verlag 2023, 644 S.) a wo tři konferencne rozprawy. Stawiznar a wotrjadnik Friedrich Pollack pisa wo konferency „Budyšin, Praha, Rom. Splećenja a interakcije w cyrkwinskich stawiznach centralneje Europy“ w měrcu w Budyskim Serbskim domje, stawiznar Thomas Widera piše wo dźěłarničce „Sorbische Kultur in den 1970er und 1980er Jahren: Überlieferung(en), Befunde, Fragestellungen“ a Jean-Rémi Carbonneau wo FUEN-konferency „Minderheitensprachen und Arbeitsmarkt. Chance oder Herausforderung?“.
Ćišćany zběrnik z čerstwej titulnej stronu
Interdisciplinarny periodikum sorabistiskich a duchownowědnych slědźenjow Serbskeho instituta z podtitulom „Časopis za sorabistiku a přirunowace mjeńšinowe slědźenje“ wuchadźa wot lěta 2023 online, za wšěch swobodnje přistupny. Přinoški wozjewjeja so jednotliwje online. Jónu wob lěto zestaja so hišće lětny zběrnik w ćišćanej formje. Njedawno wuńdźe wudaće za lěto 2023, z nowej titulnej wobalku.
Publikaciske rěče su němčina, jendźelšćina a słowjanske rěče, předewšěm hornjo- a delnjoserbšćina, pólšćina, čěšćina a rušćina. Zo byštej so serbskej rěči jako wědomostnej rěči spěchowałoj, jewja so w Lětopisu tež delnjo- a hornjoserbske přełožki.
Nastupajo awtorstwo a originalnosć wotpowěduja zapodate dźěła poručenjam DFG za zawěsćenje dobreje wědomostneje praksy. „Lětopis“ wozjewja jenož tajke dźěła, kotrež njejsu hišće na druhim městnje wušli. Teksty wozjewjeja so pod licencu Creative Commons Namensnennung 4.0 International.