Kulturny sociologa přeslědźa serbsku kopańcu – pólne slědźenje startuje na europeadźe

Dźensa (14.6.) zahaja so europske koparske mišterstwa 2024 w Mnichowje. Paralelnje wotměje so 5. europeada – koparske mišterstwa europskich narodnych mjeńšinow (28.6.–6.7.) – w němsko-dansko-friziskej namjeznym regionje. Je to kónčina ze štyrjomi narodnymi mjeńšinami: Sintojo a Romojo, Frizojo, němska mjeńšina w Danskej a danska mjeńšina w Němskej. Zhromadnje z Federalistiskej uniju europskich narodnych skupin FUEN organizuja mjeńšiny wuznamne sportowe zarjadowanje.

Njeje připad, zo zahaji sociologa dr. Kristian Naglo swoju wědomostnu dźěławosć w Serbskim instituće (SI) kónc junija z wopytom europeady a z pólnym slědźenjom tam na městnje. Nimale ze zahwizdanjom europeady startuje jeho slědźerski projekt při SI, kotryž ma dźěłowy titul: “Serbska kopańca”: wujednanja kulturneje wšelakorosće w socialnych wólnočasnych swětach, w lokalnym, narodnym a europskim konteksće (originalny titul: “Sorbischer Fußball”: Aushandlung kultureller Diversität in sozialen Freizeitwelten im lokalen, nationalen und europäischen Kontext). Swobodny kraj Sakska spěchuje projekt wot junija 2024 hač do kónca 2025.

Wuchadźejo z přikłada organizowaneje kopańcy w Serbach praša so Kristian Naglo, kotry wuznam maja socialne wólnočasne swěty za rěče a kulturne identity etniskich mjeńšin. Swoje dopóznaća chce zdobom z druhimi mjeńšinami w Europje přirunować.

Konkretnje: analyzować chce sprěnja socialny swět lokalneho towarstwa SJ Chrósćicy, zdruha cyłoserbsku wubranku muži a žonow (Serbske mustwo) na 5. europeadźe, a střeća chce sej 5. europeadu jako wulki sportowy event samo na sebi wobhladać. W projekće chce so na přikład ze wšelakimi rólemi a funkcijemi serbšćiny rozestajeć, ale tež z prašenjom za ‚žiwej dwurěčnosću‘ we wólnym času.

Přepytuje nimo toho, kak wšelake dźěle socialneho koparskeho swěta interagěruja abo kak so přeprěčeja (na př. kopańca jako hłowna aktiwita vs. serbska kultura vs. młodźinska kultura). Wuslědki studije tworja zakład za wobšěrny slědźerski projekt wo serbskich wólnočasnych swětach z perspektiwy přirunowaceje etnografije.

Kristian Naglo wuwučowaše a slědźeše na uniwersitach w Gießenje a Marburgu, na University of Lancaster (UK), na Němskej wyšej šuli za sport w Kölnje (Deutsche Sporthochschule Köln), a naposledk na Katolskej wyšej šuli w Mainzu.

• dale čitać we wobšěrnišim interviewje z dr. Kristianom Naglo. W lěće 2023 přebywaše wón někotre měsacy jako hóstny wědomostnik w Serbskim instituće. Wosebje w druhej połojcy rozmołwy rozjasni nazornje swój wědomostny přistup a swoju motiwaciju za přepytowanje serbskeje kopańcy.