Fabian Kaulfürst přewozmje 1. januara nawod wotrjada rěčespyt při Serbskim instituće
Kuratorij Serbskeho instituta je na swojim posedźenju minjeny tydźeń w Budyšinje namjetej wobsadźenskeje komisije přihłosował, zo přewozmje sorabist dr. Fabian Kaulfürst wot 1. januara 2024 nawod rěčespytneho wotrjada.
Po nimale dwěmaj lětdźesatkomaj jako wotrjadnik woteda direktor Serbskeho instituta (SI), prof. dr. Hauke Bartels, tutu funkciju nětko zastupjerjej młódšeje generacije: Wot 1. januara 2024 nawjeduje dr. Fabian Kaulfürst rěčespytny wotrjad w Choćebuzu a Budyšinje. Fabian Kaulfürst skutkuje hižo 20 lět na SI: najprjedy jako doktorand, wot 2008 jako wědomostny sobudźěłaćer w Choćebuskej wotnožce. “Z dr. Kaulfürstom budźe nimoměry dokładnje wukubłany sorabist rěčespytne dźěło na woběmaj institutnymaj stejnišćomaj nawjedować. Jeho dotalne wědomostne dźěło žněje šěroke připóznaće, runje tak kaž jeho wuběrne rěčne znajomosće, mnohostronski kulturny angažement a dobre styki do cyłeje Łužicy. Wotrjad je z tym w dobrych rukach”, tak Hauke Bartels.
Fabian Kaulfürst studowaše sorabistiku, politologiju a nabožinstwo w Lipsku. Studij zakónči 2004 z magisterskim dźěłom “Studije k rěči Kita Fryca Stempla”, kotrež bu 2005 w Małym rjedźe Serbskeho instituta wozjewjene. 2010 promowowaše na Lipšćanskej uniwersiće pod temu “Studije k rěči Michała Frencla”, dźěło bu 2012 w Spisach Serbskeho instituta ćišćane. Wot toho časa zaběraše so Fabian Kaulfürst mj. dr. z leksikografiju, korpusowej linguistiku, dialektologiju, frazeologiju a fonetiku/fonologiju. Nimo toho skutkuje w rěčnym poradźowanju a nawjeduje hižo wjele lět dwulětnje wotměwacy so mjezynarodny lětni kurs serbskeje rěče a kultury. Wón je čłon Hornjo- a Delnjoserbskeje rěčneje komisije a rěčnik poslednjeje.
Hauke Bartels bě 2004 najprjedy koordinaciju, lěto pozdźišo potom oficialnje nawodnistwo tehdyšeho wotrjada za delnjoserbske slědźenja w Choćebuzu přewzał. Po fuziji wotrjadow w lětomaj 2014/15 pomjenowa so wón potom na nawodu stejnišći přesahowaceho wotrjada rěčespyt. 2015/16 sćěhowaše přidatnje přewzaće direktorata, 2022 skónčnje powołanje na profesuru na Drježdźanskej techniskej uniwersiće. – Jako rěčespytnik budźe so Hauke Bartels – nimo uniwersitneje wučby – dale předewšěm wo po móžnosći wobšěrnu dokumentaciju delnjoserbšćiny starać.
