Rozprawa wo dźěłarničce: Dobro zwěrjatow w tradicionelnych serbskich nałožkach a na swjedźenjach

Rozprawa Stephanie Bierholdtec.

„Dobro zwěrjatow a imaterielne kulturne herbstwo“ bě titul dźěłarnički Serbskeho instituta a Domowinskeje župy Delnja Łužica 30. meje w Choćebuzu. Něhdźe 20 wobdźělnicow a wobdźělnikow, mjez nimi tójšto młodostnych, zbliži sej tradicionelnym serbskim nałožkam z perspektiwy derjeměća zwěrjatow. Wšitcy běchu sej přezjedni zo maja so nałožki zasadnje w swojich starodawnych formach připóznawać a respektować. Wobdźělnicy rozestajachu so z idejemi wo tym kak by so škit zwěrjatow w přichodźe hišće w sylnišej měrje wobkedźbować móhł. W srjedźišću steješe wužiwanje koni a kaponow pola žnjowskich nałožkow. na př. pola łapanja kokota.

Katrin Šwjelina, předsydka Rady za naležnosće Serbow, hladaše wróćo na zeńdźenje na wokrjesnej runinje na tutu temu. Stephanie Bierhodtec informowaše přitomnych wo zakonskich postajenjach a zakonjach kaž tež wo přikładach z Europy a z cyłeho swěta, w kotrychž tworja zwěrjata wažny dźěl imaterielneho kulturneho herbstwa a w kotrychž buchu zdobom postajenja w zajimje derjeměća zwěrjatow přiměrjene. Na přikład wobkedźbuja organizatorojo tradicionelneho konjaceho wubědźowanja w britiskim Ascoće jara kruće předpisy k škiće zwěrjatow a mediciniske zastaranje wobdźělenych koni za čas zarjadowanja. W ramiku zarjadowanjow pućowacych pastyrjow sposrědkuja wobdźělnicy zdobom wědu wo družinam wotpowědnym plahowanju wowcow. Po tym předstajištej regionalnej rěčnicy Heike Apeltowa a Karin Tšukowa wuslědki naprašowanja mjez młodostnymi wo tučasnym přewjedźenju a přihotowanju žnjowskich nałožkow.

Po tym so přitomni wo argumentach a idejach na dobro zwěrjatow w tradicionelnych nałožkach wuměnjachu. Na žiwej diskusiji wobdźělichu so zastupjerjo šěsć młodźinskich skupin z Delnjeje Łužicy a sobudźěłaćerjej župy Delnja Łužica Tobias Unger (młodźinski koordinator) a Franciska Albertowa (zamołwita za młodźinske dźěło w Choćebuzu). Wobdźělnicy rozestajichu sej z šěrokim spektrumom móžnosćow započawši z małymi naprawami hač k daloko sahacym změnam, wo kotrychž chcedźa zastupjerjo w swojich młodźinskich skupinach dale diskutować. Domowinska župa chce młodostnych wosebje w zjawnej komunikaciji w zwisku ze žnjowskimi nałožkami hišće sylnišo podpěrować.

„Wjeselimy so nad wot respekta a konstruktiwneho dźěła postajenym dialogom, kotryž je wšelakorosć měnjenjow pokazać zamóhł“, reziměrowaše Stephanie Bierholdtec.

Dźěłarnička wotmě so w ramiku projekta k praktikam imaterielneho kulturneho herbstwa w Delnjej Łužicy w cyłkownym projekće „Digitalny portal k serbskim a łužiskim rěčnym a kulturnym krajinam“. Załožba za serbski lud spěchuje projekt ze srědkow Zwjazkoweho ministerstwa za nutřkowne naležnosće a za domiznu wotpowědny wobzamknjenjam němskeho Zwjazkoweho sejma.