Serbski institut wědomostnu ewaluaciju dwurěčnych serbsko-němskich šulow přewzał

Wot 1. septembra přewza Serbski institut w Budyšinje wědomostny přewod ewaluacije šulow, kotrež po koncepciji “2plus” dźěłaja. Po pilotowej fazy ma so wot 2023 sem prawidłownje pola šulerkow a šulerjow 8. lětnika rěčny staw zwěsćić. Potrjechi to 16 šulow s serbskim sydlenskim rumje we Swobodnym kraju Sakska. Sakske ministerstwo za kultus (SMK) projekt financielnje spěchuje. Zdobom podpěruje Budyska wotnožka krajneho zarjada za šulu a kubłanje (LaSuB) kompleksne přepytowanje koncepcionelnje.

Rěčespytnicy Serbskeho instituta su přewzali nadawk, serbske rěčne kompetency šulerjow prawidłownje zwěsćić. Při tym dźěłaja hromadźe z kolegami a kolegowkami Rěčneho centruma Witaj, kiž su testy za certificěrowanja serbskorěčnych kompetencow nadźěłali. Dalši projektni partnerojo su kubłanscy wědomostnicy Lipšćanskeje uniwersity kaž tež statistikarjo uniwersity w Jenje.

Rěčespytnica dr. Jana Šołćina nawjeduje projekt. Wona je fachowča na polu ewaluacije a přepytowanja rěčneho stawa předšulskich a šulskich dźěći. Dalša projektna sobudźěłaćerka je rěčespytnica dr. Leńka Šołćic, kotraž zaběra so z aktualnym wuwićom serbskeje spisowneje a wobchadneje rěče. “Wosebje zwjeselace je, zo smy za nowy projekt tež wědomostny dorost přistajić móhli”, zdźěli direktor Serbskeho instituta dr. Hauke Bartels. Tak wobdźěli so na slědźenjach tohorunja Jan Bogusz, kotryž běše lětsa swój master slawistiki na Lipšćanskej uniwersiće złožił.

Informacije ke koncepciji “2plus”

W šulskim lěće 2013/14 zawjedźechu cyłkownje 13 šulow w Swobodnym kraju Sakska koncept “2plus” – po wjacelětnej wupruwowanskej fazy. Jedna so wo koncept přiswojenja rěče, kotryž nawjazuje na mjeztym etablěrowanym Witaj-projekće w předšulskim wobłuku. Koncept zaruča na zakładnych a srjedźnych šulach kaž tež na gymnazijach přezcyłny dwu- resp. wjacerěčny kubłanski poskitk. Mjeztym dźěłaja dohromady 16 šule po tutym koncepće a poskićeja nimo serbšćiny tež bilingualnu wěcnu a fachowu wučbu. Nětko ma so efektiwita přesadźenja koncepta na šulach ewaluěrować, mj. dr. z pomocu testow rěčneje kompetency.

Kooperaciske partnerojo

• Sakske statne ministerstwo za kultus (SMK)
• krajny zarjad za šulu a kubłanje (LaSuB), regionalna wotnožka Budyšin
• Friedricha Schillerowa uniwersita Jena, katedra za wuwučowanje metodow a ewaluaciske přeslědźenje (Lehrstuhl für Methodenlehre und Evaluationsforschung) (www.kompetenztest.de)
• Rěčny centrum WITAJ, Budyšin

Dalše informacije, hlej wopisanje projekta.