Załožba Volkswagenstiftung spěchuje sorabistiku z 1 milionom eurow
Zhromadna medijowa zdźělenka TU Drježdźany a Serbskeho instituta:
Serbski institut a TU Drježdźany pohłubša kooperaciju
“Integrated Digital Sorbian Studies” (IDSS) rěka nowy kooperaciski projekt Serbskeho instituta (SI) w Budyšinje/Choćebuzu z Techniskej uniwersitu Drježdźany (TUD). Na šěsć lět zapołožene předewzaće ma so w meji 2022 započeć. Přez projekt budźe sorabistika jako tak mjenowany mały předmjet na TUD widźomniša, lěpje integrowana a splećena.
Załožba VolkswagenStiftung spěchuje projekt z nimale milionom eurow we wobłuku spěchowanskeje linije “Swětowa wěda – strukturne zesylnjenje małych předmjetow”. Tak je móžno, wjacore personalne městna na woběmaj zarjadnišćomaj financować, mjez druhim dwě městnje za dorostowe wědomostnicy abo dorostowych wědomostnikow. Předewzaće ma cyłkowny wolumen něhdźe 1,6 milionow eurow (ze swójskim podźělom SI a TUD).
IDSS wužiwa potencial postupowaceje digitalizacije w duchownych wědomosćach (Digital Humanities), zo by sorabistiku skrućił a ju interdisciplinarnje w zwisku z přiwuznymi wjetšimi předmjetami kaž germanistiku a slawistiku dale wuwił. Tak ma so tež zajim dorostowych wědomostnicow a wědomostnikow za aktualne, towaršnostnje wysoko relewantne slědźerske temy sorabistiki budźić.
Tak maja so w přichodnych lětach na přikład rěčne kursy serbšćiny na TUD kruće zakótwić. Dale maja so sorabistiske wobsahi do studijnych předmjetow na fakulće za rěčne, literarne a kulturne wědomosće kaž tež do noweho mastera “Digital Humanities” na TUD zapřijeć. K tomu natwarjeja so mjez druhim digitalne korpusy serbsko- a němskorěčneje regionalneje powójnskeje publicistiki – potajkim wulke tekstowe zběrki, kotrež wolóžeja přistup k serbskim tekstam a resursam. Nimo toho planuje so we wobłuku projekta pilotowa wersija digitalneje edicije twórbow Kita Lorenca.
Projekt natwarja na digitalizaciskich naprawach Serbskeho instituta, na přikład na serbowědnym onlineportalu Sorabicon abo na delnjoserbskim rěčnym portalu dolnoserbski.de. Nimo toho móže so projekt na digitalizacisku ekspertizu Drježdźanskeje germanistiki a Sakskeje krajneje biblioteki – Statneje a uniwersitneje biblioteki Drježdźany (SLUB) zepěrać. Z tym sćěhuje IDSS wědomje zaměry ekscelencneje strategije TUD, w kotrejž hraje digitalizacija centralnu rólu.
Wědomostny minister Sebastian Gemkow wudospołni: “Dźakowano angažementej Serbskeho instituta a TU Drježdźany a nic naposledk sylnej financnej podpěrje přez załožbu VolkswagenStiftung je nětko dalši wažny přinošk k zachowanju a k skrućenju serbskeje kultury a rěče móžny. Wjeselu so, zo skutkuja w předewzaću hnydom wjacore předmjety Drježdźanskeje techniskeje uniwersity, Sakska krajna a uniwersitna biblioteka (SLUB) a Serbski institut w při digitalizaciji, slědźenju a wučbje hromadźe. IDSS budźe na wšelakore wašnje wuprudźensku móc za kulturne herbstwo Serbow wuwiwać.”
Narěčenska wosoba, zastupowaca hłownych stajerjow próstwy:
prof. Christian Prunitsch
profesura za zapadosłowjansku literarnu a kulturnu wědomosć
TU Drježdźany
e-mail: christian.prunitsch@tu-dresden.de
IDSS so spěchuje přez załožbu VolkswagenStiftung
