Dwě hornjoserbskej cyrkwinskej agendźe ze 17. lětstotka

Předmjet projekta stej dwaj dotal njewozjewjenej rukopisaj ze 17. lětstotka. T. mj. Hornjowujezdźanska agenda bu hižo w 19. lětstotku namakana, Michał Hórnik wozjewi w ČMS 1869 krótke wopisanje a někotre wućahi; po 2. swětowej wójnje płaćeše tekst jako zhubjeny, wobdźěłarka projekta pak jón w tachantskim archiwje zaso wuslědźi. Druhi rukopis dósta so 2010 do wobsydstwa Serbskeho kulturneho archiwa, jeho spisar bě Měrćin Cichorius, farar w Bukowje pola Złeho Komorowa.
Wobaj tekstaj stej zawjazanej a zdźěla zapisanej do eksemplarow samsneje němskeje ćišćaneje cyrkwinskeje agendy z lěta 1658. Wonej matej drje so hišće před wudaćom ćišćaneje hornjoserbskeje cyrkwinskeje agendy (1696) datować a pokazuja znamjenja dweju wšelakeju dialektneju zakładow. Předewšěm druhi z mjenowaneju rukopisow skića nowe kulturnohistoriske dopóznaća wo róli Wojerec. Předwidźane je wudaće transkkripcije wobeju tekstow přewodźane wot rěčneje analyzy. Tak matej so tutej dotal znatej rukopisaj šěršemu publikumej spřistupnić. Zdobom budźe edicija přinošk k stawiznam hornjoserbšćiny w 17. lětstotku.

Na projekće wobdźěleni: Dr. habil. Sonja Wölkowa