Wuwiće předčitanskeje funkcije za delnjo- a hornjoserbsku spisownu rěč

Při składnosći implementowanja „předčitanskeje funkcije“ za němske teksty na internetowej stronje Serbskeho instituta (k docpěću bjezbarjernosće) je so znowa pokazało, zo hodźa so za wobě serbskej spisownej rěči (hornjoserbšćinu a delnjoserbšćinu) prawnisce trěbne naprawy k spěchowanju inkluzije we wobłuku digitalneje komunikacije jenož pod wuraznje poćeženymi wuměnjenjemi přesadźić. Mjeztym zo steja za „wulke“ rěče hižo dawno hotowe wuwite a poměrnje tunje produkty k dispoziciji, njeeksistuja w serbskej spisownej rěči ani wužiwajomne komercielne produkty ani dosahace wědomostne předdźěła za spěšne wuwiće.
Po tym zo bě so spočatk lěta 2018 z pozitiwnym wuslědkom ze strony Serbskeho instituta sonděrowało, hač by wuwiće předčitanskeje software za delnjo- a hornjoserbšćinu na zakładźe tuchwilneho slědźerskeho stawa kaž tež najskerje k dispoziciji stejaceho fachoweho personala scyła w přiměrjenym času realizujomne było, su so za druhu połojcu lěta 2018 ze Sakskeho statneho ministerstwa za wědomosć a wuměłstwo (SMWK) najprjedy spěchowanske srědki za koncepcionelnu fazu přizwolili. 2019 přizamkny so pilotowa faza, w kotrejž zestaji so nadrobne wopisanje stawa slědźenja wo serbskej fonetice, fonologiji a ortoepiji a wuwi so na tym natwarjacy plan slědźenja. Nimo toho zahaji so wuwiće prototypa za hornjoserbsku spisownu rěč hladajo na to, zo předleža za hornjoserbšćinu hižo dosć wobšěrne slědźenja jako zakład. Za delnjoserbšćinu maja so wotpowědne přepytowanja hakle přewjesć.
Wot 2020 běži hłowna faza projekta, kontryž ma so hač do 2024 wotzamknyć. Docpěty mjezystaw so při składnosći zjawnosći předstaji, na přikład je so to na Institutnym dnju Serbskeho instituta 10.11.2021 we Wojerecach stało.

Nawod projekta: Hauke Bartels
Na projekće wobdźěleni: Jan Měškank , Astrid Schmiedelowa, Fabian Kaulfürst, Marcin Szczepański, dr. habil. Sonja Wölkowa (hač do 03/2022), Lechosław Jocz (eksterny)