Dźěłarnička šulerjow „Na serbskich slědach we Warnoćicach“
13./14. junija wotmě so wospjet dźěłarnička šulerjow k nadźěłanju wučbneje šćežki „Na serbskich slědach po Warnoćicach“. Běše to poslednja wulka dźěłarnička projekta, kotryž wot lěta 2023 zwjedźe akterow z wobeju hraničneju stron, zo bychu stawizny Serbow we Warnoćicach w powójnskim času spominali a tematisku wučbnu šćežku wudźěłali.
Projektowy team, wobstejacy ze šulerkow a šulerjow biskopskeho gymnazija we Warnoćicach pod nawodom Kláry Mágroveje a Budyskeho Serbskeho gymnazija pod nawodom Jany Štilleroveje kaž tež sobudźěłaćerkow a sobudźěłaćerjow Serbskeho instituta w Budyšinje a Warnoćičanskeje měšćanskeje biblioteki, zetka so tónraz w rumnosćach biskopskeho gymnazija. Wobdźělnicy móžachu tuž duch wsy začuwać, přetož twarjenje a bjezposrědnja wokolina běštej w lětach 1946–1949 šulske městno za serbske gymnaziastki a serbskich gymnaziastow. Hłowna tema dźěłarnički bě statna hranica a z njej zwjazane wuměnjenja přestupjenja mjezow w zašłosći a přitomnosći. Tež tónkróć wotmě so dźěłarnička w čěskej a zdźěla w hornjoserbskej a němskej rěči. Tute postupowanje wotpowědowaše hranicy překročacemu charakterej cyłeho projekta.
Zawod dr. Jany Piňosoveje a dr. Roberta Lorenca tematizowaše wuznam statneje hranicy we Warnoćicach w powójnskim času a zahaji prěni dźěl dźěłarnički, w kotrejž dźěše wo historiske žórła a wosobinske dopomnjenki Łužiskich Serbow na hraničny režim 1945–1950. W běhu prěnjeho dnja dźěłachu wobdźělnicy w skupinach a analyzowachu archiwny material k wašnju fungowanja a wuskutkam hraničneho režima na serbsku ludnosć. Po přestawce w šulskej kantinje so tema „hranica“ z pomocu filmoweho projekta pohłubši. Popołdnju móžachu sej wobdźělnicy hižo zdźěłane materialije za wučbnu šćežku wobhladać. Na kóncu předčita Měrka Mětowa swoje powědančko „Prěni raz“ z antologije ze samsnym titlom (2023). Awtorka předstaji powědančko zhromadnje z wudawaćelku Marku Maćijowej a přełožowarjom Milanom Hrabalom a wotmołwi w slědowacej diskusiji na prašenja přitomnych.
Druhi dźeń dźěłarnički zahajichu šulerjo z rekapitulaciju zaćišćow prěnjeho dnja. Po tym koncentrowachu so dźěłowe skupiny na přihot awdijowych nahrawanjow, kotrež maja dopomnjenki něhdyšich serbskich šulerjow we Warnoćicach zapopadnyć. Dźěłarnička skónči so z wuhódnoćenjom wuslědkow a zhromadnym wobjedom. Po dwěmaj dnjomaj intensiwneho a naročneho dźěła dźěchu wobdźělnicy z wjele nowymi zaćišćemi a z wjeselom na wotewrjenje wučbneje šćežki 15. nowembra 2024 domoj.
Cyłkowny projekt, spěchowany wot Załožby za serbski lud a Němsko-čěskeho fondsa přichoda, přewjedźe so wot Serbskeho instituta pod nawodom dr. Jany Piňosoveje a dr. Roberta Lorenca.
Rozprawa: Jana Piňosová.
Dotalne (nowinarske) informacije:
- Čěscy a serbske šulerjo přihotuja wučbnu šćežku wo serbskich slědach we Warnoćicach (26.9.2023)
- Šulerski projekt: Serbscy a čěscy šulerjo wuhotuja wučbnu šćežku “Na serbskich slědach we Warnoćicach” (14.12.2023)
- powšitkowne informacije wo projekće: Wučbna šćežka „Na serbskich slědach we Warnoćicach“