Přihoty za lětuši Mjezynarodny lětni kurs za serbsku rěč a kulturu běža

Ludźo z cyłeho swěta chcedźa serbsce wuknyć

Wšo dohromady je so 34 wosobow z 9 krajow za kurs přizjewiło, kotryž wotměje so wot 12. do 27. julija w Budyšinje. Hač do srjedź meje su so móhli zajimcy za Mjezynarodny lětni kurs za serbsku rěč a kulturu Serbskeho instituta zapisać. Tuchwilu so planuja ekskursije a serbowědne přednoški. W štyrjoch kursach wuwučuja so kursanća – wot započatkarjow bjez znajomosćow hač k pokročenym z rozšěrjenymi znajomosćemi a ze slawistiskim pozadkom.

Najwjace kursantow budźe z Němskeje, Pólskeje a Čěskeje, su pak tež přizjewjenja z Chiny, USA a Francoskeje. “Jara pak so wjeselu, zo změjemy zaso kursantow ze Słowakskeje, Słowjenskeje a z Ukrainy”, praji nawoda lětnjeje šule dr. Fabian Kaulfürst, kotryž nawjeduje zdobom rěčespytny wotrjad Serbskeho instituta. “Motiwacija wobdźělnikow je chětro wšelakora. Někotři maja swójbne korjenje we Łužicy, druzy chcedźa so slawistisce ze serbšćinu zaběrać abo zajimuja so za problemy narodnych mjeńšinow.”

Prěni kurs tajkeho razu wotmě so 1967, tehdy w zamołwitosći Lipšćanskeje uniwersity. Wot 1992 přewjeduje lětnje kursy Serbski institut w Budyšinje w dwulětnym rytmusu, wot 2012 pod nawodom Fabiana Kaulfürsta. Lětni kurs so sobu spěchuje přez Załožbu za serbski lud.

• dalše informacije wo kursu a jeho stawiznach
• někotre impresije zašłeho kursa (w lěće 2022)