Pytanje na portalu “hornjoserbsce.de” bytostnje rozšěrjene: Serbske wotpowědniki w online-słowniku móžeja so nětko přepytać
Na rěčnym portalu hornjoserbsce.de, centralnym digitalnym poskitku Serbskeho instituta za hornjoserbšćinu, je pytanska funkcija bytostnje rozšěrjena. Wotnětka móžeja wužiwarjo strony tež za serbskimi ekwiwalentami dwuzwjazkoweho Němsko-hornjoserbskeho słownika pytać. Za to je so nimale 200.000 hornjoserbskich wotpowědnikow indicěrowało. Při tym dźe na jednej stronje wo jednotliwe słowa, na př. “złotak”, na druhej pak wo wjacesłowne wurazy kaž “kapsny pjenjez”. Zo by so komfort za wužiwarja powyšił, su so skrótšenki a krótkopisanja w słowniku systematisce rozpušćili a wupisanym formam přirjadowali. Štóž pyta na přikład za “pjenježny”, namaka nětko tež “pjenježny kamor” jako wotpowědnik za “Geldschrank”, hačrunjež steji w słowniku na wotpowědnym městnje “p. kamor”.
“To nastupa tysacy padow. Funkcionalnosć internetoweje wersije, do kotrejež su moji kolegojo wjele dźěła inwestowali, so tak rozsudnje rozšěrja. Nas přewšo zwjesela, zo móžemy wužiwarjam tutu nowu wersiju poskićić”, praji Marcin Szczepański, rěčespytnik Serbskeho instituta, kotryž je pytanske indeksy wudźěłał. “Rozšěrjenje pytanskeje funkcije je dalša kročel k tomu, zo by so bohaty słowoskład serbšćiny wšitkim zajimcam na njekomplikowane wašnje spřistupnił.”
Rěčny portal hornjoserbsce.de skići nimo runje rozšěrjeneje centralneje pytanskeje funkcije, kotraž spřistupnja wjacore słowniki paralelnje, tež někotre stotki “rěčnych kućikow” a internetowu wersiju historiskeho wudaća zhromadźenych spisow Handrija Zejlerja. Runje su so tež wšě 49 “rěčne kućiki” z lěta 2023, wusyłane w MDR Serbskim rozhłosu, w rěčnym portalu wozjewili. Cyłkownje su na portalu mjeztym 867 kućikow wozjewjenych, kotrež su tež do pytanskeje funkcije zapřijate.
“hornjoserbsce.de je hódny grat za wšitkich, kotřiž serbsce pisaja”, wjeseli so tež nawoda rěčespytneho wotrjada Serbskeho instituta, dr. Fabian Kaulfürst. “Přeprošujemy wšitkich, zo bychu poskitki, kotrež stajnje dale wuwiwamy, pilnje wužiwali.”