Euforiske kompleksy – SLUB Drježdźany a Serbski institut wěnujetej komponistej Jurej Mětškej prěni raz koncert: 2. meje 2024 19:00 hodź.
Zhromadna zdźělenka, 29. apryla 2024
Sakska krajna biblioteka – Statna a uniwersitna biblioteka w Drježdźanach je njedawno wobšěrny material ze zawostajenstwa Jura Mětška do swojeho archiwa za načasne kompozicije přewzała. Nimo kompoziciskich awtografow, kotrež Jura Mětškowu tworićelsku biografiju wot prěnich pospytow hač k poslednim skicam wobsahuje, swědča naćiski a koncepty, rysowanki, basnje, aforizmy, korespondency a dalše dokumenty wo wobšěrnym wuměłskim žiwjenju. Nahrawanja předstajenjow, fota, plakaty a programowe zešiwki wudospołnja zběrku.
Dalše manuskripty, wosobinske dokumenty, programowe zešiwki a korespondency ze zawostajenstwa Mětška chowa Serbski kulturny archiw w Budyšinje runje tak kaž kopije jeho awtografow. Nětko wěnujetej Drježdźanska SLUB a Budyski Serbski institut serbskemu komponistej (rodź. 1. 5. 1954, zemr. 20. 1. 2022) rozmołwny koncert:
Euforiske kompleksy. Juro Mětšk w portreće
Koncert, rozmołwa a předstajenje žórłow
Hdy? 2. meje 2024, 19:00 hodź.
Hdźe? SLUB Drježdźany, Klemperer-Saal, Zellescher Weg 18, 01069 Dresden
Zastup je darmotny. Prosymy wo přizjewjenje přez webstronu SLUB.
Hudźbnicy skupiny ensemble unitedberlin předstaja komornu hudźbu Jura Mětška (hlej program). Theresa Jacobsowa moderěruje rozmołwu z komponistom Jakobom Ullmannom a ze załoženskim čłonom ensemble unitedberlin Andreasom Bräutigamom, wo konteksće nastaća a wo adekwatnym sposrědkowanju Mětškowych twórbow. Christian Ratajczak čita z tekstow Jura Mětška a wo nim z njedawno wušłeje knihi Am Ende wird von mir nur gesammelter Schabernack übrig bleiben. Juro Mětšk – Ein Porträt (Mały rjad Serbskeho instituta, zešiwk 35). Kónc zarjadowanja twori prezentacija někotrych awtografow z Mětškoweho zawostajenstwa.
“Wjeselimy so, zo zaklinča na městnje, na kotrymž so dźěl zawostajenstwa Jura Mětška chowa, prěni raz jeho twórby”, praji jeho wudowa a swobodna wuměłča Ulrike Mětškowa. “Z titulom krucha Euforiske kompleksy wopisuje Juro Mětšk sebje samoho na so jara hodźace a pregnantne wašnje.”
Charakteristiske za hudźbu Jura Mětška je hłuboke zakorjenjenje w europskej hudźbnej tradiciji předewšěm zažneho 20. lětstotka. Intensiwnje rozestaja so z twórbami komponistow kaž Albana Berga, Antona Weberna a Arnolda Schönberga a wjedźe tam zapołožene principije dale. Zwjazuje jasnje strukturěrowane zynkowe rjady z wurazliwosću, redukuje formy na to bytostne, wuzwoli zdźěla njezwučene wobsadźenja, kotrež pak wuprajenju twórby wotpowěduja.
Wotběh programa (2.5.2024, SLUB w Drježdźanach)
Juro Mětšk:
- Euphorische Komplexe (1975), Mus.15496-T-500
- Modul X (2015), Mus.15496-ZZ-534
ROZMOŁWA A ČITANJE
Juro Mětšk:
- Drei Skizzen (1972), Mus.15496-R-500
- Klavierstück I (1988), Mus.15496-ZZ-530
- … mit groteskem Riesenbogen … (trüb ein pizzicato) … (1984), Mus.15496-R-502
Sobuskutkowacy:
ensemble unitedberlin: Michiko Feuerlein (wiolina), Yoriko Ikeya (klawěr), Martin Flade (wiola)
Ensemble unitedberlin je nastał jako zbožowny sćěh zjednoćenja Němskeje. W lěće 1989 bu załoženy – jako symbol znowa dobyteho zwjazka hudźby a hudźbnikow w za dołhe časy dźělenym měsće. Skupina ensemble unitedberlin překročuje hranicy – w hudźbnym kaž tež w mjezynarodnym zmysle. Hóstne wustupy na festiwalach noweje hudźby w Albanskej, Brazilskej, Francoskej, Israelu, Pólskej, Ruskej, Španiskej, Južnej Koreji, Chinskej, Madźarskej, Šwicarskej, Iranje a w USA su sobuskutkowacym ze stajnym přewodnikom. W swojej róli jako posrědkowacy interpreća chcedźa hudźbnicy być galerisća hudźbneje awantgardy – z narokom, za stworićelow a recipientow načasneje hudźby wunošnje skutkować. Na koncertach hraje tutón ansambl přeco zaso kompozicije Jura Mětška. Dotal stej dwě portretowej CD komponista wušłoj.
Andreas Bräutigam je załoženski čłon a jednaćel ensemble unitedberlin. Mnohotneho zhromadneho dźěła z Jurom Mětškom dla wuznaje so derje ze stworjenjom komponista.
Prof. Dr. Jakob Ullmann wopytowaše po studiju cyrkwinskeje hudźby w Drježdźanach priwatnu kompozicisku wučbu pola Friedricha Goldmanna a skutkuje jako swobodny komponist a hudźbny wědomostnik. 2005 promowowaše, 2008 bu profesor za kompoziciju, notacisku wědomosć a hudźbnu teoriju na Wysokej šuli za hudźbu Hudźbneje akademije w Baselu, hdźež hač do lěta 2018 dźěłaše. 2022 spožčichu jemu Krajne hudźbne myto Saksko-Anhaltskeje.
Dr. Theresa Jacobsowa skutkuje po studiju hudźbneje wědomosće, germanistiki a komunikaciskich a medijowych wědomosćow a sćěhowacej promociji wo serbskich ludowych rejach wot lěta 2015 jako wědomostna sobudźěłaćerka w Serbskim instituće. Wot lěta 2021 je zastupowaca nawoda kulturnowědomostneho wotrjada . W lěće 2023 wuda zhromadnje z Paulom Viebegom Jurej Mětškej wěnowany dopomnjenski zwjazk “Am Ende wird von mir nur gesammelter Schabernack übrigbleiben. Juro Mětšk – Ein Porträt”.
Christian Ratajczak, grafikar w Budyšinje, dlěje hač 20 lět spřećeleny susod Jura Mětška
Nowinarske wobrazy: zawostajenstwo Juro Mětška w SLUB (Wšitke wobrazy na tutej stronje smědźa so za aktualne rozprawnistwo wo komponisće a wo zarjadowanju z podaćom awtora swobodnje wužiwać.)
