Z Maćičnym mytom wuznamjenjenaj

Młodymaj wědomostnikomaj Serbskeho instituta spožči Maćica Serbska 9. měrca na swojej hłownej zhromadźiznje Myto Arnošta Muki. Marleen Schindler a Evan W. Bleakly powabištaj so nimo dalšeju absolwentow wo Maćične myto a je dobyštaj. K tomu Serbski institut wutrobnje gratuluje!

Maćica Serbska wupisa kóžde druhe lěto dorostowe myta w třoch kategorijach: Myto Michała Hórnika za šulerjow a šulerki hornjołužiskich gymnazijow, Myto Bogumiła Šwjele za šulerjow a šulerki delnjołužiskich gymnazijow a Myto Arnošta Muki za studentow a studentki kaž tež absolwentow a absolwentki uniwersitow abo wysokich šulow.

Marleen Schindler je absolwentka Techniskeje uniwersity w Drježdźanach a dźěła tuchwilu jako wědomostna sobudźěłaćerka w Serbskim instituće. Jej spožči so Myto Arnošta Muki za jeje masterske dźěło “Emotionalisierte Blut- und Wunderverehrung in Herrnhuter Texten”. Posudźowanska komisija skedźbni na inowatiwny přistup awtorki do tematiki, wosebje hladajo na implementowanje slědźerskich prašenjow ze sorabistiskeho wobłuka resp. serbskorěčnych žórłow do germanistiki. Tole wopokaza so jako jara płódny za germanistiku kaž tež za sorabistiku. Z předmjetaj přesahowacym přistupom wotpowěduje tekst načasnym zrozumjenju sorabistiki.

Evan W. Bleakly je tohorunja absolwent Techniskeje uniwersity w Drježdźanach a wědomostny sobudźěłaćer Serbskeho instituta w projekće Serbske elementy rěčneje krajiny Delnja Łužica. Jemu spožči so Myto Arnošta Muki za jeho masterske dźěło “Upper Sorbian in the Lusatian Linguistic Landscape: An Analysis of Neighboring Municipalities”. W posudku je komisija wosebje teoretiski a metodiski přistup awtora wuzběhnyła. W zapodatym dźěle přirunuje so serbšćina w zjawnym rumje w gmejnomaj Rakecy a Ralbicy-Róčant. Konkluzije dalšeho rozestajenja wo serbšćinje w zjawnym rumje móhli wažnu orientaciju skićić a impulsy dawać.

Myto Arnošta Muki je z 500 euro dotěrowane kaž tež z darnym abonementom Rozhlada na jedne lěto.

Hłowna zhromadźizna Maćicy Serbskeje bě zdobom wólbna. Na njej wuzwoli so dr. Anja Pohončowa jednohłósnje znowa jako předsydka wědomostneho towarstwa. W nowym předsydstwje skutkuja dalši wědomostnicy Serbskeho instituta sobu: dr. Ines Kellerowa, dr. Pětš Šurman a dr. Robert Lorenc (nowy do předsydstwa woleny).

• lisćina mytowanych
• wobrazowa galerija mytowanskeho zarjadowanja, dnja 9.3.2024 w žurli Serbskeho muzeja w Budyšinje