Folklorne centry w NDR – kulturne herbstwo!?

Kónc 1970tych lět załožichu so po cyłej NDR tak mjenowane folklorne centry, kotrychž nadawk bě dokumentacija, hajenje a dalewuwiwanje kulturneho herbstwa regionow. W lěće 1977 załoži so Serbski folklorny centrum při Domje za serbske ludowe wuměłstwo na Póstowym naměsće w Budyšinje.

Dnja 21. nowembra 2023 buchu na zahajenskej dźěłarničce, organizowanej wot Serbskeho instituta w Budyšinje w kooperaciji ze Syću za wšědnu kulturu we wuchodźe, ramikowe wuměnjenja a koncepcije něhdyšich centrow kaž tež dźensniši wobstatk zběrkow w archiwach a bibliotekach. Wobdźěleni běchu nimo sobudźěłaćerjow Serbskeho instituta koleginy a kolegojo z Instituta za stawizny a ludowědu (Drježdźany), Zwjazka domizna a wobswět w Němskej (Bonn), z Wossidlo-slědźenišća za Europsku etnologiju/ludowědu na Uniwersiće w Rostocku, z Hennebergskeho muzeja klóšter Veßra, z Ludowědneho poradźowanskeho a dokumentaciskeho běrowa při Durinskim muzeju pod hołym njebjom Hohenfelden, poradźowarnja za wšědne kultury a hladanje domizny pola Krajneho zwjazka domizny Saksko-Anhaltskeje z. t. (Hala nad Solawu) kaž tež ze Sakskeho krajneho zarjada za muzejownistwo (Kamjenica). Po zwěsćenju aktualneho wobstatka je so wo zhromadnych slědźerskich prašenjach a perspektiwach diskutowało kaž tež wo planowanju přichodneje dźěłarnički w lěću 2024 w Hohenfeldźe wuměniło. –  Zarjadowanje bu spěchowane wot Swobodneho stata Sakskeje we wobłuku projekta Serbska politika w NDR. Struktury, akterojo a zajimy 1968 – 1989.

Awtorce: dr. Theresa Jacobsowa, dr. Ines Kellerowa