Šulerski projekt: Serbscy a čěscy šulerjo wuhotuja wučbnu šćežku “Na serbskich slědach we Warnoćicach”

11. decembra rozmołwjachu so šulerjo 11. lětnika Serbskeho gymnazija Budyšin z časowym swědkom knjezom Jakubom Wjacławkom (89 lět), zo by jim wo swojim času jako serbski šuler we Warnoćicach po Druhej swětowej wójnje rozprawjał. Jimaca bě to rozmołwa, kotraž wotmě so we wobłuku přihota wučbneje šćežki k serbskim slědam we Warnoćicach. Projekt přewjedu šulerki a šulerjo čěšćiny (pola Jany Štilleroveje). Hižo w nowembrje wuhotowaštaj wědomostinikaj dr. Jana Piňosová a dr. Robert Lorenc wot Serbskeho instituta šulsku hodźinu k temje. Šulerki a šulerjo čitachu dopomnjenki wjacorych absolwentkow a absolwentow (skupinske dźěło) a postajichu, što su hłowne temy spominanja. Šulerki a šulerjo Biskopskeho gymnazija Warnoćicy zetkachu so w mjezyčasu z muzejologu Janom Rybánskýom (Měšćanski muzej Warnoćicy) a zeznachu žórła z bjezposrědnjeho powójnskeho časa.

• k projektej dale čitać (zdźělenka wot 26.9.2023)
• wobšěrniša rozprawa dr. Jany Piňosoveje wo rozmołwje z časowym swědkom a z pokazku na spěchowaćelej Załožbu za serbski lud a Čěsko-německý fond budoucnosti, hlej němska wersija