Serbski institut wobdźěli so na 11. firmowym běhu w Budyšinje
Wčera (28. junija 2023) wotmě so w Budyšinje 11. firmowy běh. Organizował bě jón MSV Budyšin 04 z.t. Wuhotowarjo móžachu so zdobom nad rekordowej ličbu starterow wjeselić, wšako běše so lětsa 1396 sportowcow za běh přizjewiło. Tež sydom sobudźěłaćerjow a sobudźěłaćerkow Serbskeho instituta běchu tu nastupili. Na swojich specielnje za běh naćisnjenych zelenych T-shirtach běše stary buk widźeć, pod kotrymž steješe mjeno mustwa – “Serbske heje”. Ideja za motiw, kotryž bě Marleen Schindler (wědomostna pomocna sobudźěłaćerka w Serbskim instituće) naćisnyła, wuchadźa z lětsa w instituće załoženeje iniciatiwy “Zeleny institut”. Z iniciatiwu chcedźa so sobustawojo za naslědnosć w najwšelakorišich wobłukach w instituće zasadźić.
Oficialnje zahajene bu zarjadowanje firmoweho běha srjedu nawječor na Budyskim torhošću. Po přiwitanju wobdźělnikow slědowaše zhromadne sćoplenje z rejowanskej šulu Mühlmann. Dypkownje w 19:00 hodź. zaklinča startowy signal. Pjeć kilometrowa čara wjedźeše běharjow přez móst měra, hač k Hrodźišku. Wot tam podachu so tući dale přez Židow do zapadneho předměsta. Po puću jich přihladowarjo ze sylnym aplawsom podpěrachu. Tež wšelke stacije z napojemi běchu za spěšne wočerstwjene spřihotowane. Přez Dolinowu dróhu (Talstraße) a Behringowu dróhu bližachu so sportowcy k Třělnišću. Wot tam njebě k cilowemu dypkej hižo daloko. Přez Bohatu hasu běharjo potom zaso na Hłowne torhošćo zaběžachu, hdźež jich zdobom syła ludźi z mócnym přikleskom witaše. Po tym, zo běchu wšitcy doběželi a so wočerstwili, slědowaše mytowanje. Jako najspěšniši dnja wopokaza so Patrick König z kónčnym časom 14:59 mjeńšin. Zdobom běše tež jeho mustwo “Seidel Communication Bautzen” ze šěsć běharjemi a časom 1:05:19 hodźin najspěšniše pola muži. Pola žonow docpě Franziska Krahnich najlěpši wukon. Běharka bě po 18:19 mjeńšinach do cila doběžała. Jeje team pod mjenom “Radio Lausitz Morgenmädels” wopokaza so z pjeć běharkami a cyłkownym časom 1:25:07 jako najspěšniši pola žonow. We wobłuku “Mixed-teams” wudoby sej mustwo, pjećoch sobudźěłaćerjow “Go In Aktiv Leben Bautzen” z kónčnym časom 1:13:07 hodźin prenje městno. Mustwo Serbskeho instituta skónči běh na solidnym 45. městnje. Cyłkowny čas wotpowědowaše tu 1:40:43 hodźin.
Organizatorjo su ze firmowym běhow a předewšěm wysokej ličbu wobdźělnikow jara spokojom a wjesela so hižo na klětuše zarjadowanje, kotrež wotměje so 19. junija.
awtor: Jan Bogusz
