Maśica Serbska w Delnjej Łužicy mjez wobdźělenjom a samostatnosću

1880 załoži so w Choćebuzu delnjoserbske wědomostne towarstwo Maśica Serbska jako sekcija w lěće 1847 w Budyšinje załoženeje Maćicy Serbskeje. Hačrunjež słušeše hač do swojeho zakaza přez nacionalsocialistow 1937 k drje najwažnišim organizacijam na polu kubłanja a slědźenja za delnjołužiskich Serbow, předleži tuchwilu jenož mało, zwjetša staršich předstajenjow jeje stawiznow. Historiske wobdźěłanje aspekta institucionalizacije serbskeje kultury bě dotal do dalokeje měry na hornjołužisku Maćicu wusměrjene, kaž na přikład poslednje cyłkowne předstajenje z lěta 1997 (Měrćin Völkel) pokazuje. Zaměr projekta je sformulowanje zarysa stawiznow Maśicy Serbskeje w Delnjej Łužicy wot jeje załoženja hač do nacionalsocialistiskeho časa. Předewzaće lubi nowe dopóznaća k serbskim stawiznam pózdnjeho 19. a zažneho 20. lětstotka kaž tež k nutřkoserbskim poćaham a splećenjam mjez Hornjej a Delnjej Łužicu kaž tež k stawiznam serbskich institucijow a wědomostneho towarstwa.

Sćěhowace prašenja měli so wobjednawać: Kak wuwiwaše so powšitkownje Maśica w přepytowanskim času? Kotre zhromadnosće a rozdźěle wobstejachu mjez Maśicu a Maćicu? Kak rjadowaše so poměr mjez woběmaj zjednoćenstwomaj? Do kotreje měry emancipěrowaše so Choćebuska Maśica wot Budyskeje Maćicy? Kotru skutkownosć rozwiwaše dźěławosć Maśicy nastupajo kulturnu wěstosć delnjołužiskich Serbow?