Feministiske hibanja etniskich mjeńšinow. Studija na přikładźe Serbow:kow

Fokus projekta je wusměrjeny na feministiske prócowanja etniskich mjeńšinow na přikładźe Serbow:kow. Feminizm zrozumi so při tym w šěršim zmysle jako „movement to end sexism, sexist exploitation, and opression“ (bell hooks). Tutón přistup njewobmjezuje feminizm na reakciju na towaršnostne dynamiki, ale rozšěrja zrozumjenje na iniciatiwu abo „engine of change“.

Dotalne studije pokazuja, zo su feministiske hibanja pola mjeńšinow we wjacorym nastupanju marginalizowane. Na jednym boku so mjeńšiny husto na zakładźe indiwidualnych praktikow esencializuja a homogenizuja. To k tomu wjedźe, zo jich prócowanja ani we wědomostnym diskursu ani w cyłotowaršnostnej debaće wo feminizmje widźomne njejsu. Na druhim boku móža so feministiske prócowanja znutřka etniskich mjeńšin jako přećiwk ke kulturnym praktikam zaznawać a z tym konfliktam znutřka towaršnosće wustajene być. Nic naposledk móža akterojo z „dilemu intersekcionality“ konfrontowani być, hdyž storča zrozumjenja identity na (pozdatnje) mjez sobu so wuzamkowace konstrukcije splaha a etnicity.

Zaměr tutoho dźěła je, pozitiwny započatk k mjeńšinowospecifiskim feministiskim prócowanjam na přikładźe Serbow:kow wuwiwać. Tam přiběraja zjawne prócowanja wo runoprawosć splahow. W projekće maja so wšelake formy indiwidualneho a kolektiwneho pozicioněrowanja w zwisku z feministiskimi cilemi pod wosebitym wobkedźbowanjom konstrukcijow identity na mjezy splaha a etnicity přeslědźić.

Na projekće wobdźěleni: Alexandra Kuhring (bis 7/2024)