Call for Contributions: 5. zetkanje syće sorabistiskeho akademiskeho dorosta
Serbski institut přeprošuje pjaty raz na „tworjenje syćow“ a nawjazanje kontaktow do Budyšina. W srjedźišću zetkanja stejitej interdisciplinarna wuměna a splećenje młodych slědźacych, kotřiž so regionalnje abo tematisce ze Serbami zaběraja abo to planuja.
Na dwudnjowskim zarjadowanju maće składnosć swoje slědźerske předewzaća prezentować a diskutować. Fachowospecifiske přinoški z linguistiki, kulturnych wědomosćow, stawizniskeje wědomosće a dalšich disciplinow su runje tak witane kaž transdisciplinarne projekty z přirunowaceho mjeńšinoweho slědźenja a wobłuka Digital Humanities. Tež wuměłske abo hudźbne přinoški su eksplicitnje witane. Kak waše slědźerske předewzaće (seminarne, bachelorowe, masterske, magisterske abo doktorske dźěło) předstajiće, je wam přewostajene. Nimo toho chcemy dale wo wuměnjenjach a perspektiwach interdisciplinarneho zhromadneho dźěła rozmyslować.
Dźěłowe rěče su němčina, hornjo- a delnjoserbšćina kaž tež jendźelšćina.
Přizjewjenje:
Přizjewić móžeće so hač do 14.02.2025 pod tutym linkom. Za planowanje zarjadowanja prosymy Was někotre prašenja wo Wašej wosobje a Wašim slědźerskim předewzaću wotmołwić.
Program a jednotliwe panely planujemy po zakónčenju přizjewjenja a po wothłosowanju z wobdźělnikami. Wěsty kontingent darmotnych přenocowanjow steji k dispoziciji. Jězbne wudawki so nažel narunać njemóža.