Livestream přistupny: Podijowa diskusija “Što smy: indigeni, awtochtoni abo něšto druhe?”
Městno zarjadowanja: Serbski dom, Póstowe naměsto 2, 02625 Budyšin
Debatu w Serbskim domje w Budyšinje sćěhowaše na městnje 50 a online něhdźe 30 wopytowarjow. Livestream zarjadowanja je online přistupny na stronkach Załožby za serbski lud.
Doba identitneje politiki je tež pola Serbow slědy zawostajiła. By było sebjezrozumjenje jako “indigeny” lud postup w globalnym trendźe mjeńšinoweje politiki abo skerje přećiwk k modernemu serbskemu žiwjenju? Chcemy so spřećiwjace mysle a začuća wědomostnje prezicnje předstajić a bjez tabuwow diskutować. Njeńdźe wo přezjednosć, ale cil je zrozumić, čehodla so ludźo podobneho pochada tak rozdźělnje definuja. [z připowědźenja Sakskeje krajneje centraly za politiske kubłanje]
Kontrowersa wo tym, hač su Serbja indigeny lud, je hižo dlěje tema w serbskej zjawnosći. Je zdobom wuchadźišćo za debatu srjedu, 20. měrca.
Prašenje, hač su Serbja indigeny lud, ma wjele runinow. Mjezynarodne prawo hraje rólu, runje tak kaž historiske konteksty abo politika, kotraž spyta identitu stworić. Wědomje je Serbski institut zastupjerjo wšelakich runinow na podij přeprosył.
“Chcemy sej zapřijeća, z kotrymiž je kontrowersa wo indigeniće Serbow zwjazana, bliže wobhladać. Chcemy namakać zhromadnu, wšitkim zrozumliwu rěč”, praji moderatorka Jana Piňosová w předpolu debaty (w interviewje ze Serbskimi nowinami, wozjewjenym 18.3.24, str. 1). A dale: “Nam dźe wo dobru, wěcownu diskusiju, nic wo přezjednosć. Z debatu chcemy aktiwne rozestajenje z indigenitu Serbow podpěrać. Zrozumimy debatu jako přinošk towaršnowědneho kubłanja.”
Diskutujće sobu!
Na podiju:
- Hajko Kozel, prawiznik, čłon Serbskeho sejma, kotryž sej připóznaće Serbow jako indigeny lud žada
- Judith Šołćina, jednaćelka Domowiny, něhdyša nawodnica mjeńšinoweho sekretariata w Berlinje
- dr. Detlev Rein, fachowc za mjeńšinowe prawo, mjez 2000 a 2013 nawoda referata za mjeńšinowe prawo a mjeńšinowu politiku w zwjazkowym nutřkkownym ministerstwje
- prof. phdr. Leoš Šatava, CSc., etnologa a slědźer wo mjeńšinach, docent na Karlowej uniwersiće w Praze a na uniwersiće w Trnavje
Moderacija: dr. Jana Piňosová, stawiznarka, Serbski institut Budyšin
Zarjadowanje je tež jako livestream na internetnej stronje Załožby za serbski lud přistupne.
Rjad “Serbska debata” je kooperacija Sakskeje krajneje centraly za politiske kubłanje, Serbskich Nowin a Załožby za serbski lud. Serbski institut je třeću debatu wuhotował.
