1. Syć młodych akademikarjow-sorabistow

termin: 09.06.2017 - 11.06.2017

9.-11.6.2017 Syć młodych akademikarjow-sorabistow, Budyšin

Serbski institut přeprošuje wědomostny dorost na zetkanje do Budyšina. W srjedźišću zetkanja stejitej interdisciplinarna wuměna kaž tež zwjazowanje slědźerkow a slědźerjow, kotřiž so ze Serbami pod regionalnym abo specifisko-tematiskim widom zaběraja resp. tajke dźěło planuja. Witane su přinoški z wšelakich wědomostnych předmjetow, to rěka z rěčespyta, kulturnych wědomosćow a stawiznow runje tak kaž transdisciplinarne předewzaća z přirunowanskich mjeńšinowych slědźenjow abo z wobłuka digital humanities.
Dwudnjowska dźěłarnička skića wobdźělnicam a wobdźělnikam składnosć, swoje slědźenja předstajić a diskutować. Štóž chce swój slědźenski projekt prezentować (na př. bachelorske, masterske, magisterske resp. doktorske dźěło abo post-doc-projekt), njech prošu bórze naćisk swojeho dźěła (maksimalnje jednu A4-stronu) zhromadnje z krótkim žiwjenjoběhom (inkl. informacije wědomostneho předmjeta, městnosće skutkowanja a tučasneho dźěłoweho ćežišća) zapoda.

Nimo toho ma zetkanje k tomu přinošować, na zakładźe předstajenych slědźenjow wo wutworjenju sorabistiskeje syće z wida dorosta přemyslować. Tak hodźało so wo wuměnjenjach a perspektiwach interdisciplinarneho zhromadneho dźěła diskutować. Namjety za diskusijne koła su witane!