Wědomnostniki Pólskeje akademije wědomnosćow informěrujotej se w Serbskem insituśe

5. a 6. junija stej póbyłej w chóśebuskej wótnožce Serbskego Instituta dr. Katarzyna Sucharska a dr. Paweł Swoboda, wědomnostnika z Instituta za pólsku rěc Pólskeje akademije wědomnosćow (Instytut Języka Polskiego Polskiej Akademii Nauk). Wónej wobej se zaběratej z mjenjowědu a stej mjaz drugim wobźělonej na nastawanju wjelezwězkowego leksikona Nazwy miejscowe Polski. Toś ta zběrka jo doněnta wuchadała w śišću. Glědajucy pak na wuwiśe nowych medijow a na to, až jo aktualizacija materiala notna, planujo se něnto jeje digitalizacija, kótaraž dej byś zwězana z wótpowědnym pśeźěłanim.

A toś stej wědomnostnika wužywałej spěchowanje programa ERASMUS+, aby na městnje zgóniłej, kak nastawa internetowy serwis Dolnoserbske mjenja, kótaryž jo wót lěta 2020 pśistupny na boce dolnoserbski.de. Gósća stej se wósebnje zajmowałej za architekturu a techniku wobźěłanja datow; wažna tema jo była modularna struktura artiklow z wujasnjenjami wóznama a póchada mjenjow (gl. w źěłu Etymologija).

Intensiwna a za wobej boka wobogaśujuca wuměna a diskusije su se wjadli teke dla wěcej zakładnych temow, ako na pś. definicije wažnych za mjenjowědne źěło zapśimjeśow abo nazgónjenja zwězane z wužywaneju software. Sobuźěłaśerje Serbskego instituta, ak se zaběraju z mjenjami, su wót togo woglěda wjelgin inspirěrowane a su dojadnali z wědomnostnikami IJP PAN dalše wuwiśe zwiskow.

Wót julija 2022 wuwija se serwis w ramiku projekta Digitalny portal k serbskim a łužyskim rěcnym a kulturnym krajinam. Pśedewześe jo spěchowane pśez Załožbu za serbski lud ze srědkow Zwězkowego ministaŕstwa za nutśikowne a domownju na zakłaźe póstajenja Nimskego zwězkowego sejma.