Serbski institut na Chóśebuskej Welcome Party „Klěb a sol”

Na Chóśebuskej Welcome Party „Klěb a sol” 28. maja 2024 su se prezentěrowali regionalne źěłodawarje a iniciatiwy ciwilneje towarišnosći. Serbsku kulturu su gósći dožywili w wobceŕku „Serbski swět“. How jo na pśikład Dolnoserbska kulturna akademija póbitowała postowe kórtki módrośišća za samobaslenje. Kulturna akademija a Serbski muzej stej teke gósćam póbitowałej klěb a sol, pó kótarymaž jo zarědowanje dostało swójo mě a stej rozpšawjałej wó póchaźe togo nałoga. Za ten wuwitański swěźeń stej wuwiłej muzej zgromadnje ze Serbskim institutom małe wjeźenje. Dr. Fabian Jacobs, Dr. Jenny Hagemann a Christina Kliemowa su pokazali gósćam pó źěłach schowane drogostki serbskego wuměłstwa w zjawnem rumje Chóśebuza.

Wopśimjeśa wjeźenja bazěruju na dłujkolětnych źěłach instituta. Dalšne informacije a mysli k temje su w Sorabistiskej źěłowej papjerje 5: „(Un)sichtbares Erbe. Inwertsetzung sorbischer/wendischer Kultur am Beispiel von bildender Kunst im öffentlichen Raum von Cottbus/Chóśebuz“.

Teke iniciatiwa za łužysku krajinu pó brunicowych jamach (projekt LIL-SME) jo była pśipódla. W susedstwje k „Serbskemu swětu“ jo prezentěrował projektowy zwězk z małeju fotoweju wustajeńcu wšake woblica krajiny pó brunicowych jamach. Gósći su byli tak pśepšosone, aby diskutěrowali wó kompleksnych stawiznach krajiny a se rozgranjali wó cele wósobinskich pśistupach.

Rozpšawa wót Jenny Hagemann.